Shillong, Rymphang 06 : U Myntri Rangbah ka Jylla Conrad K Sangma ula kubur ba ka jingkhang dam ia ki par dewiong bala shu ieh ha Jylla ka dei ka jingeh kaba khraw bha iaki bor pyniaid synshar.
“Ban khang dam ia ki 22,000 tylli ki par dewiong bala shu ieh, ka dei ka jingeh kaba tasam bha ia kino kino ki bor synshar….ka lah ban shim ia ngi da ki snem ki snem ban khang dam tang ha kawei ka District” ula ong.
U Conrad ula kynthoh ia kane haba kren halor ka jingbthei bomb ha ka par tih dewong beain ha East Jaintia Hills, kaba la shim haduh 18 tylli ki mynsiem briew.
Ula kular ban leh da kaba tyngeh pyrshah ia kiba don bynta bad ong “Ngin shim ia ka sienjam kaba tyngeh pyrshah ia kino kino kiba don bynta ha kane”.
U Myntri Rangbah ula kubur ruh ba ka jingtih dewiong beain ki dang bteng ban long ka jingeh kaba khraw wat hapdeng ki jingpyrshang ban pynshlur ia ka kam tih dewiong daka jingstad saian.
“Kum kine ki jingjia ki ju jia, haba…ka jingtih dewiong beain ka jia, ka bym dei satia ban jia bad kane ka jingbthei bomb ka jia, ka bym dei satia ban jia” ula ong.
