Shillong, Rymphang 06: U Myntri Rangbah ka Jylla u Conrad K Sangma u la pynpaw ba ka Sorkar kam pat rai ia ki tarik ban pynlong ia ka elekshon MDC jong ka Garo Hills Autonomous District Council (GHADC).
“Ngim pat rai halor kane ka kam. Ngi lah dep pynkhreh ia ka Cabinet Memo . Lehse ngin sa rah iakren ia ka ha ka jingialang kynhun Myntri Sorkar ban wan” ong u Conrad haba kylli halor ka elekshon MDC GHADC.
Ha kaba iadei bad ka jingioh thep Vote ki bym dei ki riewlum Garo, u Myntri Rangbah u la ong “Kane ka la don naduh ki por mynshwa. Naduh u snem 1952 ka thup nongthep vote (Electoral Rolls) kaba kynthup ia ki nongthep vote ki bym dei ki riewlum Garo ka la don.”
U Conrad u la ban jur ba kane ka kam ka donkam ïa ka jingïakren bad ka jingïathir kaba janai bha bad baroh ki kynhun da kaba bynrap, “Ka dei ka mat kaba donkam ïa ka jingïakren bad ka jingïathir kaba jylliew bad ki Kynhun baroh hashuwa ban shim rai”.
U la pynpaw ba namar ka elekshon MDC sha GHADC kala jan artad, Ka Sorkar kan ïaid shakhmat ban pyndonkam daka thup nongthep vote (Electoral Roll) jong ki nongthep vote kiba la don lypa.
“Kumba ka long mynta ka elekshon ka la jan bad kumta ngi la iaid shakhmat ban pyndonkam daka thup nongthep vote (Electoral Roll) jong ki nongthep vote kiba la don lypa” u la ong.
U Myntri Rangbah u la pynpaw ba kane ka mat ka donkam ïa ka jingïasngewthuh jingmut bad jingïakren kaba kham jylliew. “Hynrei kumba nga la ong ka donkam shibun ka jingiakren, jingiatai bad ka jingtei ia ka jingiasngewthuh jingmut bad shisien ba ngi la iatreilang ngin sa lah ban rah ia kane ka mat shakhmat” u la bynrap.
.){kind=link}