Shillong, Rymphang 06: Da ka jingthmu ban pynkhlain ia ka sawdong sawkun jong ka jingsengkam lajong, u Myntri Rangbah ka Jylla u Conrad K. Sangma ha ka sngi Palei ula pynkup burom ia 150 tylli ki jingsengkam ha ka PRIME Meghalaya Onboarding and Graduation Programme kaba la long ha Ward’s Lake, Shillong.
Kane ka jingialang kadei ka jingpyniaid shakhmat ia ki Top 75 Startups ne jingsengkam kiba la shah jied hapoh jong ka Chief Minister’s E-Championship Challenge 6.0 bad ka jingpyndep ia ka Graduation jong ki 75 tylli ki Startups na ka Cohort 5 jong ka prorkam ai jinghikai.
Haba kren ha ka jingialang u Myntri Rangbah ula pynpaw ba ka sorkar ka iengskhem ha ka jingkular ha kaba iadei bad ka jingsengkam bad ka khot ia ka kum ka bynta kaba niah shakhmat ban wanrah ia ka jingkylla ha ka ioh ka kot ka jylla.
“Ka jingsengkam lajong ka lah ban wanrah ia ka jingphylla ia ka jylla bad ia ka ri” ong u Myntri Rangbah bad ka bynrap, ba wat hapdeng ka jingiai bteng ia ki jingiasyllok bad ki nongsengkam, hynrei kaei kaba la iai bteng ban shaniah kadei halor ka jinglah ka jongki.
Ula pynshai ba ha ki khyndiat snem kiba la dep, ka Meghalaya kala duna bha ha kaban kyrshan ia ki Startup hynrei mynta ki prokram sengkam kala ioh ia ka jingithuh bad khusnam na ka Sorkar India.
Da kaba pynpaw ia ka jingshem kaba nalade hi, kum u nongsengkam uba mad ia ka jingeh hashwa ban rung sha ka kam sain pyrthei, u Sangma ula ong, ba u sngewthuh ia ki jingtynjuh, jingbynniaw bad ka jingbym long thikna kaba mad da ki nongseng kiba dang samla.
“Nga iohi ia kajuh ka jingmad ha ki khmat kiba phalang ki jongki. Ka sorkar kan leh ia kaba bha tam eh ban kyrshan ia phi ha ka lynti iaid ha ka jingsengkam” ula ong bad ka maham ba ka jingsengkam kadei ka jingiaid kaba bun bha ka jingdawa. “La thaw ia ka PRIME ban btin lynti ia phi lyngba kitei ki jingtynjuh kiba phi mad”.
U Myntri Rangbah ula banjur ruh ba ka jinglong jingman ka ioh ka kot, ka jingpyniaid shakhmat ia ki jingtei, ki prokram kiba iaid da ka mishon bad ka jingpynwandur ia ki polisi kadei kaba la pyniadei bha bad ka jingroi jong ka jingsengkam. Ula banjur ruh ia ka jingkongsan ban ai jingithuh ia ki jingsengkam kiba kyrpang bad kiba tbit lyngba ki sienjam jong ka E-Championship Challenge ban ai mynsiem ban iaid ia ka kolshor ban leh ia kiei kiei kiba long thymmai.
U Commissioner & Secretary u Dr Vijay Kumar D, ula ong, ba ka jingkyntiew ia ka jingsengkam ka long ka jingtynjuh kaba eh bad kaba sngewtynnad ia ka Meghalaya, namar ba ka jinglong jingman ka jingjngai ki jaka na ki iew ki hat, hynrei ula pynpaw pat ba ka jingiaineh skhem bad ka jingleh ia kiei kiei kiba long thymmai jong ki nongsengkam na ki shnong ki thaw kala iarap ia ka jylla ban tei suki suki ia ka jinglong jingman ha ki sawdong sawkun jong ka jingsengkam.
Ha kane ka prokram, u Myntri Rangbah ula pyllait paitbah ruh ia ka PRIME Entrepreneur Catalogue, sam ia ki khusnam ia ki Top Performers ne kiba leh bha ha ka Incubation Programme ha ki kyrdan ki bapher bapher bad la pynkup burom ruh ia ki kito kiba la pyndep ia ka graduate ha ki Startups na ka Cohort 5 bad Cohort 6.
