Shillong, Rymphang 05 : U Myntri Rangbah ka Jylla Conrad K Sangma ha ka sngi Palei, ula ong ba ka Sorkar Jylla kan hap pynlut sa T.817 klur shisnem ban pyntreikam ia ka rukom siew tulop ba thymmai sha ki palat 23000 ngut ki nonghikai Adhoc bad SSA, ka ban treikam naduh ka 1 tarik Iaiong, 2026.
Kane ka rai ka thmu ban pynbeit noh ia ka jingdawa kaba la slem ban pynbeit ryntih ia ka rukom siew tulop bad ka jingshngain ka kam na ka bynta ki nonghikai.
“Ka pisa baroh lang kaban sa pynlut (ban pyntreikam) ha kane ka jingsiew tulop thymmai sha ki nong hikai ka long kumba T.817 klur. Kane kan long manla u snem kaba ka Sorkar Jylla kan hap pynlut” ong u Conrad haba kren sha ki lad pathai khubor hadien ba pyniaid ia ka jingialang jong ka Kynhun Myntri ha ka sngi Palei.
“Baroh kine kiei kiei kin sa jia ha kine ki 60 sngi ban wan bad ngin sa pyntreikam ia kane ka rukom siew tulop ba thymmai hapoh ka 1 tarik Iaiong 2026” ula pynbna.
Kane ka jingsiew kan kynthup ia ka jingpynkiew tulop manla u snem, ka jingpynheh ia ka tulop kat kum ka jingtrei slem ia ka kam bad ka kyndon ban synniang sha ka Contributory Provident Fund (CPF).
Ia ki kam ban pyntreikam yn sa shim rai ha kine ki arbnai ban wan, namar kane ka rukom siew ba thymmai kan sa treikam noh ha ka 1 tarik Iaiong, 2026.
