Bthah ia u DC bad SP ban kem ia ki trai par, ki nongpyntrei par
Shillong, Rymphang 05 : Ka Iingkashari Meghalaya High Court kala shim ia ka suo-motu notice halor ka jingbthei bomb ki lai tylli ki par tih dewiong beain ha Thangsko, East Jaintia Hills bad bthah ia u Deputy Commissioner bad Superintendent of Police ba kin leh eiei mardor ha kaban ithuh bad kem ia ki trai par, ki nongpyntrei par bad kurup ruh ia baroh ki tiar ki tar ba donkam.
Ia ka hukum la pynmih da ka Division Bench bala khlieh da u Justice HS Thangkhiew bad Justice W Diengdoh ha ka sngi Palei hadien ba 18 ngut ki nongbylla kila iap ha ka jingpynbthei bom beain ha kane ka par dewiong.
Ka Iingkashari kala pynpaw ia ka jinglyngngoh bad wat hapdeng ki jingjia ba dang shu jia ha ka 14 tarik Kyllalyngkot 2026, ka jingtih dewiong beain ka dang bteng ha ka thain.
“Ka Iingkashari kam banse ban shim judicial notice ia kine ki khubor. Ym lah ban sngewthuh ba kumno ka jingtih dewiong beain ka dang bteng ha kane ka thain watla kala don ka jingiap uwei u briew ha ka jingjia ba jia ha ka 14-01-2026” ong ka Iingkashari ha ka hukum ba pynmih ha ka sngi Palei.
Ka Iingkashari kala bthah ruh ia u Deputy Commissioner bad u Superintendent of Police ka East Jaintia Hills, ba kin shimkhia mar mar ha kaban ithuh bad kem ia ki trai par bad ki nongpyntrei par bad kurup ruh ia ki tiar ki tar ba donkam.
Ka Iingkashari kala bthah ruh ba u DC bad SP ka EJH, ki dei ban wan mih hi dalade ha ka 9 tarik Rymphang 2026 ha ka por 10:30 baje mynstep hakhmat ka Iingkashari, ha ryngkat ki jingbatai ba bniah ia ki kam bala leh bad ban ai ia ki daw balei ba iohlad ka jingtih dewiong beain”.
La bthah ia ki borkhmih ba kin ai ka jingiarap ha ka liang ka jingsumar ia ki briew kiba shah ktah bad ban wan mih dalade hakhmat ka Iingkashari ha ka 9 tarik Rymphang, ryngkat ki jingbatai ba bniah ia ki kam bala leh.
“Lada kam don ka jingbud ryntih, ki hukum kin sa nang mih” maham ka Iingkashari.
