Shillong, Rymphang 06 : Ki Pulit, kila ioh tam sa 2 tylli ki metiap jong ki nongbylla tih dewiong, kiba iap na ka jingbthei bomb hapoh ka par tih dewiong beain ha ka thain Mynsngat,Thangsku, East Jaintia Hills.
Ka jingiap jong ki nongbylla kala kiew sha ka 18 ngut baroh lang kat haduh mynta hynrei ka jingwad ia ki briew ba sahkut sha kane ka par, ka dang iaid shakhmat.
U Superintendent of Police Vikash Kumar ula ong “Ngi la ioh tam haduh 18 tylli ki metiap haduh mynta”.
U iathuh ba uwei u briew ula mynsaw bad la pynkit ia u sha Shillong na Sutnga PHC.
Une u Heh Pulit ula pyntip ba la register ia ka ejahar suo muto ha Khliehriat Police Station hapoh ka kyndon 105/118(2)/3(5) BNS pule lang bad ka kyndon 21/21(1) MMDR Act pule lang bad ka kyndon 3 Explosives Substances Act. Ka jingtohkit mynta kala iaid shakhmat.
U Kumar u iathuh ba ka kynhun National Disaster Response Force (NDRF) bad State Disaster Response Force (SDRF) kila poi ha katei ka jaka ban iarap ia ki pulit ha ka jingwad ia ki nongbylla ba sahkut shapoh ka par.
Kane ka jingbthei bomb la suba ba kane jia ha ka por ba tih dewiong ha kane ka par, ia kaba la ngeit ba ka dei ka jingleh kaba beain.
Na ka liang u Myntri Rangbah ka Jylla Conrad K Sangma ula hukum ban pynlong ia ka jingtohkit kaba bniah halor kane ka jingjia bad ban pynngat ha ka jingpynsajia kaba tyngeh ia ki briew kiba donkti.
