Manipur | Bam smai u Yumnam Khemchand kum u Myntri Rangbah ba thymmai

Imphal, Rymphang 4: U nongialam ka Bharatiya Janata Party (BJP) Yumnam Khemchand Singh ha ka sngi Balang u la bam smai kum u Myntri Rangbah ka jylla Manipur ha Lok Bhavan ha Imphal.

Ha ryngkat bad ki MLA ka BJP uba dei na ka jaitbynriew Kuki u Nemcha Kipgen bad u MLA jong ka Naga People’s Front L Dikho kila bam smai kum ki symbud myntri rangbah ka jylla.

U nongialam ka NDA legislature party u la leit ban kam na ka bynta ban ioh thaw sorkar hapoh ka jylla tang ha ki khyndiat kynta mynta ka sngi.Na ka daw jong ka jingia umsnam hapdeng ki ar jaitbynriew hapoh ka jylla kala shah pynhap noh hapoh ka jingsynshar President rule naduh u bnai Rymphang mynshem snem u 2025.

Na ka liang u Myntri Rangbah duh ka ri u Narendra Modi u la ai khublei ïa u CM ba dang shu bam smai bad ïa ki deputy CM.

“Ka jingai khublei ia u Yumnam Khemchand Singh uba la bam smai kum u Myntri Rangbah ka Jylla Manipur.Nga ai khublei ia ka Nemcha Kipgen bad ia u uLosii Dikho kiba la bam smai kum ki Deputy Chief Minister jong ka jylla bad ia u u Konthoujam Govinda Singh kumjuh ruh ia u Khuraijam Loken Singh ha ka jingbam smai kum u minister jong ka sorkar Manipur.Nga kyrmen skhem ba kin trei shitom na ka bynta ban pynkhlain ia ki kam pynroi na ka bynta ki hymen bad ki para jong nga ha Manipur,” u la ong ha ka X.

Ha kane ka sngi la don lang katto katne ngut ki nongthaw ain ka BJP, ki heh ophisar jong ka seng, bad ki nongialam ba ha khlieh duh jong ka NDA ha ka Jylla.

U Khemchand Singh u dei u dkhot bad u nongtrei jong ka RSS uba la slem bha bad u nongïalam uba pynleit jingmut bha ha ka seng bad uba la bat ïa ki kyrdan ba kongsan ha ka riti synshar bad u myntri ba la bat ha ki kyrdan bapher bapher hapoh ka Jylla.

U la don ka jingiadei kaba slem bha bad ka Taekwondo.U dei uba la bat ia ka kyrdan black belt, u dei ruh u vice president barim ka Taekwondo Federation jong ka ri India bad u la don bynta ban kyntiew ia kane ka jingialehkai ha kane ka dong shatei lam mihngi.