Shillong, Rymphang 02 : U Myntri ka Koit ka Khiah Bah Wailadmiki Shylla ha ka sngi Nyngkong, ula pyntip ba un sa pynlong ia ka jingialang bishar kam ha kaban pynbeit ia ka kam ba iadei bad ka jingseng ia ka Sub-Centre ha ka shnong Hingaria, kaba don ha khappud bad ka Bangladesh.
Kane kala mih hadien ba ki nongialam ka Shnong Hingaria, kila iakynduh ia u bad kyrpad ia ka Sorkar ba kan mynjur ha kaban seng ia ka Sub Health Centre ha ka shnong.
Haba iakren bad ki nongthoh khubor, u Bah Wailad ula ong ba ka Sorkar kala thmu ban seng ia ka Sub-Centre ha Hingaria hynrei hadien la pynkynriah noh has Mynkre namar ka jingbym lah ban leh bad ka jingbym biang ha ka jingdon paid kat kum ki kyndon.
“Ka jaka kam iahap satia bad ka jingdon paid ruh ka long hapoh 3000, bad ka Huroi Sub-Centre, kaba jngai tang 3 Km, kala khmih lang ia ka jingdonkam jong ka Hingaria” batai u Bah Wailad.
Hynrei, haba pyrkhat ia ka jingdon ka Hingaria sha kyndong eh bad ba iajan bad ka Bangladesh, u Bah Wailad ula kular ban sa shong ia ka jingialang bishar kam ban peit ia kaei kaba lah ban leh.
“Ngin pyrshang ban wad ia ka lynti kaba iabeit lang, hynrei ngi hap ban bud ia ki kyndon ban seng ia ka sub centre” ula bynrap.
Ha ka dorkhas, ka Dorbar Shnong kala pynpaw ba kat kum ka jubab RTI bala ioh na u District Medical & Health Officer ka East Jaintia Hills, ka Tnad kala dep leh ia ka sorjamin, hynrei ia ka skhim la rah noh shawei da kaba pynpaw ia ka jingpat biang ka jaka. Hynrei, ka Dorbar Shnong kala kam ba ka khlem ioh ktien eiei halor kane bad ka kloi ban ai jaka na ka bynta ka centre.
Kala pynpaw ba ka shnong kala sakhi iaka jingjur ka jingiap ki longkmie ba kha khun, ka jingduna ka jingioh injek ia ki jingpang bad ka jingma lada pang namar ba slem ban ioh ia ka jingsumar.
“Ngim lahshuh ban shu peitkai ia ki Longkmie ba pun khun, ki khunlung ba dang kha bad ki nongpang ba shitom jur ba kin duh ei iala ka jingim haba pynkit ia ki sha ki hospital kiba jngai” ong ka Dorbar Shnong.
Shuwa kane, ka MLA Kong Santa Mary Shylla kala kren ia kane ka kam hapoh ka Iingdorbar Thaw Ain ka Jylla.
