Shillong, K’Lyngkot 31: U Symbud Myntri Rangbah ka tnat Urban Affairs bah Sniawbhalang Dhar u la pynbna ia ka jingthmu ban leit jurip ia ki projek bapher bapher kiba la pyntreikam ha kylleng ka nongbah Shillong ha ka taiew ban wan.
“Ha ka taiew ban wan ngan leit jurip ia ki projek ba la pyntreikam ha kylleng ka nongbah Shillong” ong u Bah Sniawbhalang.
Halor ki projek ban pynitynnad ia ka sor Shillong, u Bah Sniawbhalang u la pynpaw ba ka Sorkar ka don iaka por kaba biang ban pyndep ia ki Project kynthup ban tei iaki project kam pynroi bapher bapher. “Ngi don sa ar snem ka por ban pyndep” u la ong.
Haba kylli ia ka jinglut na ka bynta ki projek, u Bah Sniawbhalang u la iathuh baka jinglut ka kot palat T.30 klur.
U Symbud Myntri Rangbah u la ban jur baki project kam pynroi ki kynthup ia ki lynti iaid kjat bad ki kam pynitynnad iaka sor Shillong.
“Mynta ki kam pynroi ki kynthup ban tei ia ki lynti iaid kjat bad ki kam pynitynnad iaka sor Shillong bad hadien kata, ngin pynkhuid sa ia ka Wahumkhrah” u la bynrap.
