Shillong, K’lyngkot 24 : Ka Meghalaya bad ka Punjab ki la iakhaid da mar lai kol,ha ka jingiakhun kaba dei naka bynta ka Group B jong ka lympung ialehkai National Football Championship ka Santosh Trophy 2025-26, kaba long Dhakuakhana, Assam, mynta ka sngi.
Ia ki lai tylli ki kol ka Meghalaya la thep ia ki da u Owanijuh Pajuh (35′), Babysunday Marngar (69′) bad Deibormame Tongper (78′), katba na ka liang ka Punjab la thep ia ki da u Jagdeep Singh (60′), Himanshu Jangra (71′) bad Harmanpreet Singh (81′).
Ha kaba kut ka kylla kaba ar (seond round) ka Meghalaya ka don ha ka kyrdan kaba ar ka miej iakhein point, hadien ba ka khur 4 point ryngkat bad ka Kerela, ha kaba saw tylli ki team ba ioh khur bun point, kin jam pat sha ka kyrdan iakhun ka quaterfinal.
Haba phai sha kane ka jingiakhun, u bah Khlain Pyrkhat Syiemlieh u wanrah ia kawei ka jingkylla ha kane ka kynhun na ka jingialehkai kaba la dep ar sngi mynshwa bad ka Odisha, ha kaba u Owanijuh u la wan ban mih pli naduh kaba sdang ha ka jaka ka jong u Fairming Suting, ha kaba kane ka jingkylla, lah ban ong ba ka la long kaba seisoh, hadien ba u Owanijuh, u la lah ban lam khmat ia ka kynhun ba kan ioh ia ka kabu ksiar ban thep ia ka kol kaba nyngkong .
Ka Meghalaya ka la lah ba kan iai tam shakhmat d akane ka shi kol tad haduh shi kynta ha kaba u Jagdeep u la ioh ban rah shakhmat ia ka bol bad ha ka por kaba biang ban khyrwit jam bha ia ka bol, kaba u Rajat Paul I kumba u la ioh ban ktah ia kane ka bol hynrei kaba la thok kynsan ia u bad blait kan lait na ki kti bad khih pynban ka jar.
Mar shi kol la iakhaid, bad kane ka jingiakhun ka la khlit bha, ha kaba ka Meghalaya lyngba u Babysunday u la ioh ban thep ia ka kol kaba ar hadien ba u la ioh tehlakam ia kabol kaba la iarap ban pynbuh sha u da u Deibormame.
Hynrei ka Punjab kaba dei ruh ka jylla kaba la rah teng ia ka nam kum ka lahduh kane ka lympung ka iai tynjuh borbah ia ka Meghalaya ha kaba u Himanshu u la ioh ia ka kabu ban pynphai kylla ia kane ka kol kaba ar ba la tam shwa da ka Meghalaya lyngba ka corner.
Ka kol kaba lai ia ka Meghalaya ka la wan lyngba u Deibormame,, kaba wna hadien ba u Babysunday u la tied tok ia ka bol bad u Deibor ha ka khyllipmat kaba biang bha da ka kjat kadiang dain u la shut jam bha ia ka bol ban sam lyngba ia I ranmg ap kol ka Punjab u Karandeep Singh.
Hynrei ym slem hadien kane u Harmanpreet ka Punjab u la ioh ban head ia ka bol ban pynkhih ia ka jar bad ban lah biang ban pyniakhaid ia kane ka jingiakhun.
Wat hadien ba ka Meghalaya kam lah ba kan khur ia ka lai point kaba pura, pynban ka jinglah pat ka jong ka tang ba kan shu iakhaid na kane ka jingiakhun, ka pynlong ia kane ka kynhun ba ialam u bah Khlain ba kan iai don beit ialade ha ka thong ban jam sha ka quarter, ha kaba ka jingiakhun kaban wan kan dei la 27 tarik pyrshah ia ka kynhun ialehkai ka Services, kaba dang ioh khur tang ar point na ki arsien ialehkai ba ka la dep, kaban long ha Silapathar, ha ka por 2 baje nohphai sngi.
