Baghmara, Jan 21: Ka Meghalaya hynne ka sngi Balang, kala rakhe ia ka jingdap 54 snem ka jingioh la ka jylla kaba la pynlong ha Baghmara ha ka sien kaba nyngkong, da kaba phaikhmat sha ka South Garo Hills bad ai burom bad pynsahnam ia u kpa uba la seng ia ka jylla bad u Myntri Rangbah ba nyngkong eh ka jylla u (L) Captain Williamson A. Sangma.
U Myntri Rangbah ka jylla u Conrad K. Sangma ula ong ba ka rai ban pynlong ia ka jingrakhe ka jylla ha Baghmara ka pyni ia ka jingkut jingmut ban pynthikna ba kan ym don kano kano ka thain ruh ha Meghalaya kaban shah ieh ne shah ieh shadien. Ula kubur ba kane ka thain kala shah ieh la bun phew snem bad ong ba ka jingpyrshang kala iaid shakhmat ban wanrah ia ka jingkylla.
Ula kam ba kane ka jingrakhe ka long kaban sahnam, u Myntri Rangbah ula ong ba ka Baghmara, ka district kaba shong basah u Captain Williamson A. Sangma, ka long ka jaka kaba biang bha namar la thaw ia ka Meghalaya da ka jingiatylli, jingiaishah bad ka jingiakhun khlem ka jingiaumsnam.
Haba kren ha ka jingialang, u Sangma ula ong ba ka Meghalaya kala ioh ia ka rekod ha ka jingkiew kumba 10 percent ha kine ki 3 snem kiba la dep, kaba la long kawei na ki jylla kaba kiew sted hapoh ka ri bad ula ban jur ba ka roi ka par kadei ban ioh mad ha ka jingim kaba man la ka sngi jong ki paitbah ym pan paw tang ha ka jingai jingkhein.
Ula pynbna ba ka wat baar jong ka Baghmara water supply project ka kot T. 140 Klur la dep ban pyllait shi sngi shwa bad pynthikna ba ka jingshna ia ki surok bad ka koit ka khiah ha ka thain kadei kaba buh hakhmat eh.
Da kaba pynpaw ia ka jingsngewkhia ia ka jinglong jingman jongka Baghmara Civil Hospital, ula ong ba ia kane ka jaka sumar un sa kyntiew noh bad un sa khmih hi dalade ban pynthikna ba kin don ki briew kiban trei, ka jingkhuid jingsuba bad ki tiar ki tar.
U Myntri Rangbah ula ai burom bad pynpaw ka jingsngewnguh ia ki nongialam kiba la ialam ia ka jingiakhun ban pynioh ia ka jylla bad ula maham pyrshah ia ka jingmih ka jingiapait iapra ha ka imlang sahlang, khamtam eh ha ki rynsan social media. Ula ong ba ki paitbah ka Meghalaya shisien ki lah iatylli na ka bynta ka dawbah bad kyntu ia ki nongshong shnong ba kidei ban iengskhem ha katei ka mynsiem.
U Sangma ula iathuh ba ula iohpdiang ia ka shithi kaba la phah shimet sha u da u Myntri Rangbahduh ka ri u Narendra Modi uba la phah ia ka jingai khublei ha kane ka sngi jong ka jingrakhe.
Ka shithi kala pynkynmaw ruh ia ka jingnoh synniang u (L) P.A. Sangma bad kubur ia ki kam kiba ula shimkhia ha kaban pynwandur ia ka Meghalaya bad ia ka ri.
U Symbud Myntri Rangbah Bah Prestone Tynsong ula ong ba kane ka jingrakhe kan long ka jingsahnam ha ka histori bad ka kdew ba lehse kane kadei ka sien kaba nyngkong eh ban kat katne ka jingialang kaba heh yn pynlong ha Baghmara. Ula kubur ba ka South Garo Hills kadei kawei na ki district kaba sahdien bad ula ong ba ka sorkar kala pynleit jingmut ia ka roi ka par ha ki jaka kiba don ha kyndong eh, khamtam ia ka jingpyniasoh lyngba ki surok bad ka bynrap ba ka surok Shillong–Baghmara la dep ban shna pyndep haduh 60 per cent.
U Myntri ka pule puthi u Bah Lahkmen Rymbui ula ong ba ka Meghalaya Day kadei ka khyllipmat kaba pyni ia ka jingiaid lynti ka jylla bad ia ka lynti iaid kaba nangne shakhmat. Ula pynpaw ba ka sorkar kala ai ka jingshakri kaba iajan ia ki paitbah naduh u snem 2018 kala wanrah ia ka jingkylla kaba lah ban iohi ha kylleng ki thain bad pynpaw ruh ia ki sienjam kiban kyntiew ia ka jingiatylli, ka jingtei ia ki sap ki phong bad ka jingaikam aijam.
U Chief Secretary u Dr. Shakil P. Ahammed, haba ai jingkren maitphang ula banjur ia ka jingkongsan ban pynneh ryntih ia ka roi ka par bad ka jingkiew ka Shillong kadei ruh ban long lang ha kylleng ki District kum ka Baghmara.
Haba kren halor ka Vision 2032, ula ong ba kadei kaba la kyrshan da ka jingpynwandur bad ka jingpyntrei kaba biang, ia kaba ka jingiohnong ym sa iohi ha ki surok, pule puthi, ka rep ka riang, ka jingpynkylla dur ia ka jingsengkam sengjam.
Kane ka jingrakhe kala sdang da ka jingrwai ia ka State Anthem da ka Khmih Choir, Shillong, la pynbud pat da ka jingpyni ia ka kolshor ki Khasi bad Garo. La pynbna ruh ia ka Meghalaya Day Awards, Excellence Awards bad Governor’s Police Medals kum ka jingithuh ia ka jingnoh synniang bad jingai jingshakri.
Kane ka prokram kala kut da ka jingpyni ia ka video Rise Meghalaya, ka jingai khublei bad ka jingrwai ia ka National Anthem ne ka jingrwai ka Ri.
 Captain Williamson A. Sangma.){kind=link}