Kyntu u CM ban kyntiew kyrdan man ka por ia ka jinghikai pyntbit ia ki Pulit
Baghmara, K’lyngkot 20 : U Myntri Rangbah ka Jylla Conrad K Sangma ha ka sngi Ba-ar, ula plie paidbah ia ka skul Counter-Insurgency-Any-Terrorism (CIAT) bad ka Integrated Police Welfare Complex ha Baghmara, South Garo Hills, kaba pyni ia ka jingnang pynkhlain ia ki jingtei ba donkam jong ka Tnad Pulit bad ka jingpynkhreh iaki lad jingiada hapoh Iing.
Ha kane ka jingialang la iashimbynta lang da u Symbud Myntri Rangbah Bah Prestone Tynsong, u Myntri ka Tnad Pule Puthi Bah Lahkmen Rymbui, ka Director General of Police Kong I Nongrang, IPS, u Chief Secretary Dr Shakil P Ahammed, ki Heh Ophisar IPS bad ki Heh Pulit.
Haba ai jingkren, u Myntri Rangbah ula ai khublei ia ka Tnad Pohiing bad ka Tnad Pulit ba kila leh ban pyndep ia kane ka project bala sahteng la slem bha bad ula ain am ia ka jingiohi jngai jong u Davis NR Marak, IPS, uba la sdang ia kane ka project ha ka por ba u bat kum u Superintendent of Police (SP) bad mynta ba shakri kum u Inspector General of Police.
“Nga kwah ban ai burom ia ka jingiohi jngai jong u, ka jingaiti lut bad ka jingkut jingmut ban pyniaid shakhmat ia kane ka project kaba kongsan, wat hapdeng ki jingeh ba iakynduh ha lynti iaid” ong u Conrad.
Ula ai khublei ruh ia ka bynta jong u Myntri barim ki kam Pohiing bad Myntri ba mynta ka Tnad Pule Puthi Bah Lahkmen Rymbui, namar ka jingmang pisa tam ban lah pyndep ia ka project. “Mynta ka sngi, ngi sngew sarong ban plie ia kane ka complex” ong u Myntri Rangbah.
Haba kren halor ka jinglong kongsan ka jaka ba ka Baghmara ka don, u Conrad ula ong ka skul CIAT ka dei kaba biang eh na ka bynta ki jingai jinghikai ka juk mynta ban iakhun pyrshah ia ki kaikhlaw bad ki kynhun lehnoh namar ba ka don ha ka khlaw kaba rben bha, ka jaka riat ba jynjar bad ka suinbneng kaba tynjuh bha. Ula bynrap ba kane ka skul ka lah ban ai jinghikai ym tang ia ki Pulit ka Meghalaya hynrei ia ki Ophisar na kiwei pat ki Jylla bad nabar ri ruh kumjuh.
Haba ban jur ia ka jingnang mih ki jingtynjuh ha ka liang ka jingshngain, u Myntri Rangbah ula kyntu ia ki Ophisar ba kin iai kyntiew kyrdan man ka por ia ki jingai jinghikai pyntbit. “Ka jingwanrah iaki buit thymmai bad ka jingai jinghikai ba thymmai kan long kaba kongsan bha, khamtam haba ngi don marjan ka khappud bad kiwei ki ri nalor ki jingkylla ka jinglong jingman ha ka liang ka jingshngain” ula ong.
Kine ki project ki dei kiba la wanrah ha u snem 2011-12 hapoh ka skhim NLCPR (mynta ka NESIDS-OTRI). Ia kane ka project la pynkylla bunsien ia ka mang tyngka namar ka jingkiew dor bad lah ai jingmynjur biang ha u snem 2021. Da ka jingmynjur ba khatduh ia ka mang tyngka ba T.19.18 klur, ka complex ka kynthup ia ka Officers Mess, JCO Mess, Police Welfare Training Centre bad ka Recreational Centre nalor kiwei ki jingtei kum ka surok bad ka top um. Ia kane ka project la pyntreikam hapdeng u bnai Rymphang 2022 bad u Kyllalyngkot 2026.
Haba ai jingkren, u Symbud Myntri Rangbah Bah Prestone Tynsong ula ong ba kane ka jingplie ka dei ka dak ka roi ka par kaba heh bala pynleit jingmut na ka bynta ka South Garo Hills. “Ka Baghmara kan sa ioh mynta ia kajuh ka jingpynleit jing mut bad ki kam pynroi kumba ioh kiwei ki district” ula ong haba bynrap ba kiwei ki project kum ka dispensary bad ka sports complex yn sa pyndep noh ha kine ki snem ban wan.
Kiwei pat kiba la ai jingkren ki kynthup ia ka DGP Kong I Nongrang kaba la pyntip ruh ha ka jingialang ia ka jingkhlad noh u DGP barim Bah W.R Marbaniang nalor u Chief Secretary Dr Shakil P Ahammed bad kiwei kiwei.
 bad ka Integrated Police Welfare Complex ha Baghmara, South Garo Hills, kaba pyni ia ka jingnang pynkhlain ia ki jingtei ba donkam jong ka Tnad Pulit bad ka jingpynkhreh iaki lad jingiada hapoh Iing.){kind=link}