Shillong, Kyllalyngkot 20: Ia ka met basah jong u Rev Dr Rieweh Robert Cunville la tep don burom hynne ka sngi Baar ha u Lum Jingtep ka Balang Presbyterian Laitumkhrah, ha Lawjynriew.
Ha ka por mynstep la sdang shwa ia ka jingiaseng ha ka iingsah jong u Rev Dr Cunville kaba don ha Upper Lachumiere bad hadien kane la rah ia ka met u Rev Dr Cunville sha ka ïingmane jongka Balang Presbyterian Laitumkhrah ha kaba la pynlong ia ka jingiaseng kyrpang kaba la pyniaid da u Moderator ka KJP Synod Pdeng u Rev T Khongjee.
La ioh ia ka jingkren na ka Dr Elaine Duncan kaba mihkhmat ia ka United Bible Society, u Roy Graham na ka Billy Graham Evangelistic Association, na ka Presbyterian Church of India, ka KJP Synod Pdeng bad u Secretary ka Balang Presbyterian Laitumkhrah u T.bn C Diengdoh ula ai jingkren halor ka histori shaphang u Rev Dr RR Cunville ha ka jingshakri ia u Blei bad ia ka balang bad khamtam ha ka jingleit ban ialap ia ka ktien u Blei ha kylleng satlak ka pyrthei.
Hadien kane la ioh ruh ia ki jingrwai na ka Choir ka Balang Presbyterian Laitumkhrah bad na u Rev Terence Wanshong bad la sakhi ruh ba kane ka iingmane kala dap smam da ki riewngeit, ki heh ki hain, ki nongialam jong ki balang bapher bapher bad kiwei kiwei kiba la wan na kylleng ka ri India bad ki ba nabar ka ri.
La rah noh ia ka met jong u Rev Cunville sha u lum jingtep ha Lawjynriew bad hangne la pyndep ia ka lehniam lehrukom bad la tep donburom ia une u nongialam niam uba pawnam ha ka ri India bad ha ka pyrthei baroh kawei.
