Shillong, K’lyngkot 18: Hapdeng ki jingkhuslai ba nang kiew ki kam tuh kali arshaka ha kylleng ka Jylla, ki Pulit ka West Jaintia Hills kila pynkhlain ia ka jingtreikam, kaba lam sha ka jingioh kurup biang ia 37 tylli ki kali arshaka bad iohkem haduh 19 ngut tang mynta u snem.
Kat kum ka kyrwoh ba pynlait da ka Ophis u Superintendent of Police ka West Jaintia Hills, kala don ka jingkiew ha ka jing tuh ia ki thuk thuk bad ki scooty ym tang ha West Jaintia Hills hynrei ha kiwei ki District jong ka Jylla ruh kumjuh.
Ha ka jingialeh kaba jop, ki Pulit kila ioh ban bat ia lai tylli ki kali arshaka ha ka jingtalasi kali bala pynlong ha Lad Demthring ha ka miet 16 bad 17 tarik Kyllalyngkot 2026. Ki nongniah jong kine ki kali arshaka kila ialeh ban phet na kane ka jaka talasi kali bad kyntait ban sangeh, kaba lam sha ka jingkthong kaba jur hashuwa ba kin ieh ia kine ki kali bad phet ialade sha khlaw.
Ha ka jingkhynra kaba pynbud, ki Pulit kila ioh kem ia uwei na kine ki runar uba la tip kyrteng kum u Meshanki Langstang, ia kaba ki Pulit ki ong ba u dei u briew uba ju donkti ha ki kam tuh thuk thuk. Ki Pulit kila kem ia u bad wanrah sha Jowai Police Station ban nang tohkit shuh shuh.
Ka jingkhein ki Pulit ka iathuh ba hapdeng ka 1 tarik Kyllalyngkot, 2025 haduh mynta, la ioh ban pdiang haduh 41 tylli ki jingujor ba shah tuh ki kali arshaka hapoh ka District, ia kaba 37 tylli lah register da ka case.
Da ka jingtrei shitom ki Pulit, baroh 37 tylli ki kali arshaka lah ioh ban kurup biang bad la pynphai pat ia ki sha ki trai hadien ki jingpynshisha baroh.
U SP ula pynthikna ba haduh 19 ngut ki briew kiba donkti ha ki kam tuh kali arshaka kila shah kem bad mynta kine ki runar kiladon hapdeng ka jingshah tian bishar kat kum ki kyndon ain.
Haba pynmih ia ka jingbthah, ki Pulit ka WJH kila kyntu ia ki nongshongshnong ba kin peitngor bha bad shim ia ki lad jing iada, kynthup ka jingpynieng ia ki kali ha ki jaka kiba shngain bad kiba meh light, pyndonkam ia ki steering lock bad kiwei ki kor iada kum ka GPS system bad kiar ruh na ki jaka pynieng kali ba kynjah khamtam ha ka por mynmiet.
La kyntu ruh ia ki paidbah ba kin pyntip mar mar lada don kano kano ka jingshah tuh lane ka jingishankhmat sha ki Police Station ba marjan da kaba phone ha u nomboe 112.
