SHILLONG, JAN 17: U Myntri ka Sorkar Jylla uba long ruh u MLA ka BJP na South Shillong u Bah Sanbor Shullai hynne ka sngi Saitjain, ula leit jurip ia ka jingtei ia ki projek ha Madan Laban, kaba kynthup ia ka jingshna ia ka surok bad ka jingshna pynbha ia ka madan football.
Ia kane ka jingjurip la pynlong ha ryngkat ka jingdonlang ki ophisar na ka tnad PWD, Water Resources bad ka tnad Sports ha kaba la iadon lang ruh ki nongkitkam shnong.
U Bah Sanbor Shullai ula jurip bniah ia ka jinglong jingman jong ka jingshna ia ka surok bad ka pynpaw ba la mang T.11.23 Klur ia katei ka projek kaba kynthup
T.4 Klur ban shna pynheh ia ka surok bad T.6 Klur ban shna ia ka Artificial Football Turf.
Ula leit ruh ban jurip ia ka jingkhyllem ka kynroh jong ka madan football bad ula bthah ia ki heh ophisar ba kidei ban sdang noh ia ka kam ban tei ia ka Check Dam bad ka jingpynpoi ia ka umbam umdih kaba la antad kan kot ia ka T. 2 Klur.
“Kane ka projek kan ai jingmyntoi kaba khraw ia ka shnong ka thaw khamtam eh ia ki khynnah skul kiba pyndonkam ia katei ka surok man la ka sngi” ong u Bah Sanbor.
Ula banjur ia ka jingkongsna ban pyndep ia katei ka projek ha ka por kaba la buh da kaba ong, “Ngan pynthikna ba kine ki projek kidei ban pyndep noh kham kloi”.
