Shillong, K’lyngkot 17: Ka Directorate of Enforcement (ED), Shillong Sub Zonal Office, kala ujor ia ka Supplementary Prosecution Complaint ha ka 16 tarik u Kyllalyngkot pyrshah ia ki 13 ngut ki briew kiba donkti ha ka kam thok pisa jong ka Pearlvine International hapoh jong ka Prevention of Money Laundering Act (PMLA), 2002.
Ha ka jingujor la kynnoh ba kitei ki riewshimet kila donkti ha ka Ponzi Scheme (ka skhim shukor da kaba kynshew pisa kaba siew ia ki nongkynshew ba nyngkong da kaei kaba mih na ka jingkynshew kiba hadien) kaba heh da kaba leh thok ia ki nongkynshew tyngka kaba kot ia ka T. 395.35 Klur.
Ki tyllong kila iathuh ba ka ED kala sdang ia ka jingtohkit halor ka ejahar kaba la rejistar da ka CID, Meghalaya Police katkum ka jingujor ka RBI, Shillong bad la Charge Sheet hapoh ki kyndon jongka IPC, 1860 pyrshah ia ki briew kiba donkti ha kane ka kam shukor pisa ia kaba la leh hapoh ka kyrteng jongka Pearlvine International, kaba la pyntreikam lyngba ka website www.pearlvine.com.
Kine ki briew kila lum ia ka jingkynshew kaba duna duh T.2,250 kum ka bai rung dkhot ne membership fees bad pyniaid ia ka skhim ha India ha ka jingpyntreikam ka jongka, naduh u snem 2018 haduh u Lber 2023.
Ha katei ka por, la pynlong ia ki Seminar ha kylleng ki bynta jong ka ri ban pynrung dkhot bad ban pynpawnam ia ki jingioh jingmyntoi. Ha kawei ka por ha u snem 2022, ka Pearlvine International kala kam ba kala don ia ki dkhot haduh 80 lak ngut ha ri India bad shabar ri.
Ha ka jingtohkit la shem ba ka jingiohlum baroh ia ka PoC ha ka kyrteng jongka Pearlvine International (www.pearlvine.com) ka long T.1,575 klur bad la kumno kumno kala ioh ban thok haduh T. 395.35 Klur.
Ha ka Supplementary Prosecution Complaint, ka ED kala kynnoh ba uwei u Parvesh Saroha ula pyntreikam ia ka www.pearlvine.com. Kala kynnoh ruh ba u Neeraj Kumar Gupta udei uba la pynwandur ia katei ka jingthmu bad ula thied ia katei ka website ha u Naiwieng 2015 bad ula pynlong ruh bun tylli ki Seminar jongka Pearlvine International ha India bad ha Thailand ban kyntiew ia ka jingpyniaid ia kane ka skhim thok.
Ki tyllong kila iathuh shuh shuh, ba ka ED ka lah dep ban ujor ia ka Main Prosecution Complaint ha ka 23.10.2024, ha kaba u Parvesh Saroha, ryngkat bad u Sony Chyrmang bad u Khroborme Chyrmang, ia kaba la shem ba kila pyniaid iew ia katei ka skhim ha ka jylla Meghalaya, ha kaba la shim ba kidei kiba la leh ia ka kam sniew. Kane ka case ka dang don hapoh jong ka jingtian bishar.
Ka jingkurup ia ki jingdon jingem da ka ED ha kane ka kam bymman kala kot ia T.54.98 klur. Ka jingtohkit ia kane ka kam ka dang iaid shakhmat.
, Shillong Sub Zonal Office, kala ujor ia ka Supplementary Prosecution Complaint ha ka 16 tarik u Kyllalyngkot pyrshah ia ki 13 ngut ki briew kiba donkti ha ka kam thok pisa jong ka Pearlvine International hapoh jong ka Prevention of Money Laundering Act (PMLA), 2002.){kind=link}