Shillong, K’lyngkot 14 : U Myntri ka Koit ka Khiah Bah Wailadmiki Shylla ula kyntait ia ka jingdawa ban phiah ia ki prokect ka tnad ka Koit ka Khiah sha ki song barit barit ne lyngkhoh lyngkhot, da kaba kdew ia ka jingduna nongtrei ban khmih ia ki.
“Ka Tnad ka Koit ka Khiah kam don satia ia ki nongtrei kiba bun, kum ka PWD lane PHE lane kiwei ki tnad Engineering” ong u Bah Shylla.
Haba kren sha ki lad pathai khubor ha ka sngi Balang, u Bah Shylla ula batai ba ka jingphiah ia ki project sha ki song barit barit kan buh ha ka jingeh ia ki engineer ban leit khmih ia ki kam.
“Lada jan baroh na ki kam la phiah sha ki song kiba rit, kan long kaba eh ia ki Engineer, Junior Engineer ba kin khmih ia ki kam” ula ong.
Ka All Meghalaya Contractor and Supplier Association (AMCSA) kala daw aba ia ki project dei ban phiah khnang ban ailad ia ki contractor trai shnong ba kin iashimbynta ha ka jingthep tender. Ka AMCSA kala kynnoh ba ka jingklop lang ia ki project kala pynduh lad ia kiba bun ki contract trai shnong, bad pynmyntoi tang ia ki katto katne.
