Shillong, K’Lyngkot 14: Ka jingtei iaka Jowai Shopping Market Complex kaba la sahteng la slem bha ka la jan dep, ha kaba u Contractor u la lah ban trei bha, ong u Myntri Sorkar bad MLA ka NPP na Jowai constituency Bah Wailadmiki Shylla.
“Ngi sngewkmen shibun ia ka jingiaid shakhmat jong ka Jowai Shopping Complex. Nga ai khublei ia u Contractor namar ba u la trei bha. Nga tharai un lah ban pyndep ïa kane ka Project hashuwa ka por bala buh” ong u Bah Wailad.
Ïa kane ka project la mang nyngkong haka jinglut kaba T.20 klur, hynrei ka Sorkar kala mang thymmai T.25 klur ban pyndep ia baroh ki jingtei.
Ïa kane ka Complex la khmih lynti ban aiti noh sha ka Jaintia Hills Autonomous District Council (JHADC) hadien bala pyndep lut iaki jingtei.
Ka project ka la sahteng namar ka jingpynkylla ha ka rukom tei khlem ka jingmynjur na ka Ministry ka Sorkar Pdeng.
“Ngi la shim khia ban pynim biang ia kane ka project namar ka dei ka lad kamai jakpoh jong ki paidbah, ym tang jong ka Jowai hynrei jong ka Jaintia Hills baroh kawei. Nga sngewkmen ba ngi la lah ban pynngeit ia ka Sorkar jylla, bad nga sngewnguh ia u Myntri Rangbah ka Jylla uba la ai ka jingmynjur T.25 klur na ka bynta ban tei pyndep ia ka Project” u la ong.
“Ka projek ka la sahteng namar ka jingkylla ha ka rukom tei iaka Building. Ka la dei ban long ka Building kaba G+6, hynrei la pynkylla sha ka G+2 khlem ka jingtip jong ka Ministry. La pyllait ia ka bhah kaba nyngkong, hynrei ynda ka Ministry ka la jurip, ki la lap ia ki jingkylla bad kim shym la pyllait ia ka bhah tyngka kaba ar”.
Haba kylli hato ka don kano kano ka jingthmu ban shim ia ka jaka kaba don ha khmat ka Jowai Shopping Market Complex, u Bah Wailad u la ong, “Ka jaka kaba don ha khmat ka Jowai Shopping Market Complex ka dei ka jaka jong ka District Council, bad ka shong ha ki ban sdang ia kino kino ki jingthmu ban pynheh. Kum u MLA ka thain, nga kwah ban don ka jingshim ia ka jaka, hynrei kam dei kaba suk ban shim jaka khlem da siew ka bai lutksan”.
“Nga kwah ban pynshai kumba ka long mynta, kam don kano kano ka jingthmu jong ka Sorkar ban shim ia kata ka jaka. Ka dei ka jaka jong ka District Council, kumta ka shong ha ki. Nga kwah ban don ka jingshim jaka hynrei kam long kaba suk ban shim ia ka jaka khlem da siew bai lutksan. Ka donkam ia ka jingiakren kaba bniah halor kane” u la ong.
