Shillong, K’lyngkot 14 : Ki seng bapher bapher ka North Eastern Hill University (NEHU) kila kyrpad ia u Myntri Rangbah ka Jylla Conrad K Sangma ba un tuklar halor ka kynrum kynram ha ka rukom pyniaid kam bala mad da ka skulbah.
“Ngi la iakynduh ia u Myntri Rangbah ban pyntip sha u ia ka jinglong jingman ba mynta ha NEHU. Kum ki kynhun ba don bynta, ngi la pynpaw markhmat ba ka University kam don satia ia kino kino ki khlieh pyniaid kam-ia mynta ym don VC, ym don Pro-VC, ym don Registrar, ym don Finance Officer-bad kane kala wanrah ia shibun ki jingeh ha ka jingpyniaid kam hapoh ka University” ong u President ka North Eastern Hill University Teachers’ Association (NEHUTA) Prof Lakhon Kma.
U Prof Kma ula kyntu ia u Myntri Rangbah ban pynthikna ia ka jingthung noh ia u Khlieh pyniaid kam ha NEHU bad ong “Ngi kyrpad ia u ba un tuklar bad wanrah ia ka lynti ban pynbeit khnang ba ka NEHU kan don noh ia u Khlieh nongpyniaid kam”.
U Myntri Rangbah ula pynpaw ia ka jingsngewthuh ia ki jingkhia kane ka kam bad u lah ban shim ia ki sienjam kiba donkam.
Kane ka kynrum kynram kala ktah ia ka jingsiew tulop ia kumba 900 ngut ki nongtrei (non-teaching staff) bad ki nongtrei ba shu shim nabar, ki bym pat ioh satia ia ka tulop u bnai Nohprah.
“Ka jingtuklar u Myntri Rangbah kan long shisha ka jingiarap ban ioh ia ka jingshai la ka Pro-VC F Marak kan trei ne em ia ka kam kum ka VC” ong u Prof Kma.
Ka NEHUTA ka kwah ban pyntreikam ia ki kyndon ka NEHU Statutes, ba shah ia ka Pro-PC ban trei ia ka kam VC ha ka jingbym don u VC.
“Ngi kwah ba u Myntri Rangbah un pynthikna ba ki kam ki jam hapoh ka University kin iaid beit iaid ryntih bad ban don mano mano ki ban pyniaid ia ki kam” bynrap u Prof Kma.
Haba kylli, une u President ka NEHUTA ula ong “Nga ngeit ba un pyndonkam ia ka Ophis ban phah ktien sha ka Pro-VC ka Tura Campus ba ka hap ban burom ia ki kyndon. Ka kyndon ka kren shai ba haba u VC ym don, ka Pro-VC ka lah ban trei ia ka kam jong u. Lada kam leh, ka hap ban pynpaw iaka da kaba shai lyngba ka jingthoh”.
Haba iai ban ia ka jingdawa ban weng noh mardor ia u Vice Chancellor ba mynta u Prof PS Shukla, u Prof Kma ula ong “Kaei kaba ka Ministry kan leh ia u Vice Chancellor ka dei kawei pat ka bynta jong ka kam. Ngi kwah ia u ban shah weng noh. Lano kin leh ia kane, ngim lah ban pynbor ma ngi”.
 kila kyrpad ia u Myntri Rangbah ka Jylla Conrad K Sangma ba un tuklar halor ka kynrum kynram ha ka rukom pyniaid kam bala mad da ka skulbah.){kind=link}