Nongstoin, K’lyngkot 14: Ka District Magistrate, Eastern West Khasi Hills District ka la pynjari da ka kyndon ain kaba 163 BNSS, 2023 ba khang pyrshah ia ka jingwan shalan beain, ne pyniaid iew tuh ia ki dohkha kiba la wan kit na Bangladesh, khlem ki kot ki sla kiba biang.
La maham ruh ia ka jingpyndohkam ia ki kali, ki lieng bad kiwei kiwei ki tiar ha ka ban kit bad shalan ia ka dohkha bad ruh ia kito ki riew shimet ne ki kynhun kiba don bynta ha ka ban pyniaid ia kane ka kam beain.
Ia kane ka ain la pynjari hadien ka jingdon jong ka jingkhaii tuh bad pyniaid iew ia ki dohkha na Bangladesh ha kiba bun ki jaka khappud bad wat ha ki iew ki hat. Namar kane kan ktah ia ka kamai kajih jong ki nongshong shnong, ka ktah ia ka shongsuk shongsain bad ka buh jingma ruh iaka jingshngain jong ka ri.
Kino kino kiba ialeh pyrshah kin ngat ha ka jingshah pynsaja katkum ka Kyndon ain 223 BNSS Act, 2023, bad kiwei ki Kyndon Ain kum ka BNS, Custom Act, Foreign Act, Passport Act, etc.
