Shillong, Kyllalyngkot 13: U MLA ka UDP na West Shillong Bah Paul Lyngdoh ula phah da ka jingthoh sha u Myntri ka tnad Bording Bah Metbah Lyngdoh ba pynpaw ia ka jingsngewkhia halor ka jingduna ka jingpynpoi bad jingsam bording elektrik ba dang iai bteng ha ka jylla Meghalaya.
Katkum ka jingpynsngew ka jongu, ka jingpynlip khah khah ia ka bording elektrik, ka jingpynlip bording khlem da pynkhreh bha bad ka jingthud ha ka rukom sam ia ka bording kala ktah ia ki iing ki sem, ka khaii pateng bad ki kam ai jingshakri kiba kongsan.
“Nga pan jingpynshai na u Myntri halor kine ki mat kiba kongsan bad kyrpad ba dei ban don ia ka “Comprehensive Action Plan” bad kadei ruh ban don ha ka rekod” ong u Bah Paul Lyngdoh, uba long ruh u Nongaibuit ka tnad Social Welfare, ha ka shithi kaba la phah hynne ka sngi Baar.
Ula banjur ia ka jingdonkam ban shim ia ki sienjam kiba mardor, da kaba pynpaw ba ka ktah ia ka jingshngaiñ jong ki paitbah, ka kamai kajih bad ia ki kam ai jingshakri kiba kongsan.
U Bah Paul ula pynpaw ruh ia ki 7 tylli ki jingkylli kiba kongsan, kaba kynthup ia ka jinglong jingman jong ki jingtei ha kaba iadei bad ka jingpyniaid bad jingsam, AT&C Losses bad ka jingpyntreikam ia ka Automation bad SCADA-Based Monitoring Systems.
Ula banjur ba ka bording kadei kaba kongsan bad ka jingai jingshakri kaba kongsan ia ki paitbah bad kam long kaba iahap ia ki paitbah kiba pyndonkam ia ka bording ba kin mad jingeh na ka jingpynlip khah khah ia ka bording bad ban don ka jingkiew ne jinghiar jong ka Voltage ne Voltage Fluctuations.
U Bah Paul ula ong, ba kala don ka jingiapher bak la bak halor ka jingshim jingkitkhlieh ki heh ophisar bad ka rukom ai ia ka jingshakri bad ka kdew ba la mang bun ia ka pisa na ka bynta ki jingtei ban pynkhlain bad ban iaid katkum ka juk kaba mynta.
“Ka jingbym iohi ia ka rukom pynbha kala pynmih ia ka jingsngewkhia kaba jur ha kaba iadei bad ka rukom pynwandur, ka jingpyntreikam bad ka jingiohi jngai jong ka tnad bording” ula bynrap.
Ula kyntu ia u Myntri ban wanrah ha ka jingialang jong ka kynhun Myntri da kaba buh ia ka por bad ia ka rukom treikam kaba paka ban pynduna ia ka jingpynlip ia ka bording elektrik, ban pynbha iaka rukom pyniaid bad rukom sam bording, ban tem ia ka jingduhnong bad ia ka jinglait tuh jong ka khajna bad ban pynneh biang ia ka jingshaniah ki paitbah ia ka kam sam bording ka jylla.
“Nga shaniah ba phin shimkhia ia kane ka kam da kaba leh mardor bad shimkhia shisha kumba ka donkam bad ban wanrah ha ka jingialang jong ka kynhun myntri bad sha ki paitbah ka jylla ia ka rukom treikam kaba shai kdar, kaba don ia ka jingkitkhlieh bad ka jingai ia ka jingkhein jingdiah bad ka jingpynmih ia u soh lyngba ka lynti kaba la pynwandur ban pynneh ia ka rukom sam bording kaba shaniah ha kylleng ka jylla” la ong u Bah Paul.
