Agartala, K’Lyngkot 11: Ka jingïakynad hapdeng ki ar jaitbynriew ka la mih ha ka sngi saitjaiñ ha Kumarghat jong ka distrik Unakoti, Tripura hadien ka jingiakajia ban lum synniang na ka bynta ka tamasa.
Na kane ka jingiakynad la don san ne hynriew ngut ki briew kiba la mynsaw bad ka la pynlong ia ka jingthang ding kaba la pynjulor ia ki katto katne ki iing, la iathuh ki tyllong khubor na ki pulit.
Halor kane ka jingja, ka sorkar Tripura ka la pynjari ïa ki kyndon 163 jong ka Bharatiya Nagarik Suraksha Sanhita (BNSS), 2023, ka la buh ïa ka kynhun shipai pahara kaba khlain, bad ka la khang ïa ka mobile internet ha kylleng ka subdivision na ka bynta 48 kynta kum ka jingïada.
Ka khubor na ki pulit ka la iathuh ba ym duna ia ka 8 ngut ki briew ki la shah kem ha kaba iadei bad katei ka jingjia, katba katto katne ngut kiwei pat la shah buh hapoh custody. Ka jinglong jingman ka la long jai jai hapoh ka jingteh lakam haduh ka step jong ka sngi U Blei.
Katkum ka jingïathuh jong ki Pulit ka Tripura, kane ka jingïakynad ka la mih ha ka sngi Saitjaiñ ha kaba kawei ka kynhun ki samla ki la pynsangeh ïa kawei ka kali kit dieng ha Saidarpar kaba hap hapoh u pud u sam jong ka Fatikroy Police Station bad ki la dawa ïa ka jingsiew na ka bynta katei ka tamasa.
Na kane kala mih ka jingiapyni bor bad ka jingiania hapdeng kine ki ar kynhun bad kynsan kynsan kane kala kylla ka jingiakynad hapdeng jong ki.
Katba nang jur ki jingeh, la iathuh ba ki jingjia wiang ding kaba la lam pat sha ka jingpynjot bad pynjulor ia ki mar ki mata, kynthup ia ka jingthang ia ka dukan bad ka jingpynjot ia ka jaka mane Blei.
Ha kaba iadei bad kane ka jingjia la buh ia ki bor pahara ne ki shipai ka sorkar pdeng ki la pynlong ia ka jingiaid rah lama ha kane ka jaka ban pynioh biang ia ka jingshaniah hapdeng ki nongshong shnong.
Ki bor pyniaid ki la buh ia katei ka jaka hapoh ka jingpeitngor kaba jur bad ki la kyrpad ia ki paidbah ban pynneh ia ka jingsuk bad ban kiar na kaba pynsaphriang ia ki khubor lamler.
Baroh ki seng saiñpyrthei ha Tripura ki la pynrem ïa kane ka jingïakynad bad ki la kyntu ban long jai jai, katba ki heh ophisar jong ka jylla ki la pynpaw biang ba yn leh da kaba tyngeh ïa kito lada lap ba ki donkti ha ki jingkulmar.
