Dibrugarh, K’Lyngkot 10: Hadien ba ka sorkar Assam kala thmu ban kdup ia ka jaitbynriew Mising, Tiwa bad Rabha hapoh ka khynit ba hynriew ne ka Sixth Schedule jong ka riti synshar ka ri, ka jingdawa kala nangjur sa na ka jaitbynriew Sonowal Kachari, Deori bad ka Thengal Kachari ba kin ioh ia kajuh ka jingiada bad ka jingsynshar laitluid.
Haba kren bad ki lad pathai khubor ha Banikanta Pegu Bhawan ha Dibrugarh ha ka sngi saitjain, ki nongialam jong ki seng bapher bapher ki la pdiang sngewbha ia kane ka jingpynrung ia ki jaidbynriew Mising, Tiwa bad Rabha hynrei ki la ther tyngeh ia ka sorkar jylla kaba la kyntait noh ia ki jaitbynriew Sonowal Kachari, Deori bad Thengal Kachari.
Ki seng ki la khot ïa kane ka jingshah kyntait “ka jingle bym hok,” da kaba kynnoh ba sa shisien pat la iehnoh beiñ ïa ki jingdawa jong ki kiba la slem bha.
Shwa ia kane ka sngi, la pynlong ia ka jingialang lang hapoh ka jingialam jong u Dr Abdul Deori, president jong ka Deori Assong Sixth Schedule Demand Committee. Ha kane ka jingïalang la wan ïashim bynta da ki nongmih khmat jong ka All Assam Sonowal Kachari Students’ Union, ka Deori Assong Sixth Schedule Demand Committee, ka Sonowal Kachari Yuva Parishad, ka All Assam Deori Mahila Parishad, bad kiwei kiwei ki nongmih khmat na ka imlang sahlang.
Ki seng ki la rai da kawei ka sur ban pynlong ia ka jingiakhih lang ban dawa ia ka kyrdan jong ka Sixth Schedule bad ki jingiada katkum ka riti synshar na ka bynta ki lai tylli ki jaitbynriew.
Ka jingialang ka la rai ban pynshong nongrim ia ka jingdawa jong ka halor ki jingai jingmut jong ka Bhuria Committee Report jong ka snem 1996, kaba la wanrah sha ka Parliament da u Dr Dilip Singh Bhuria, bad kdew ruh ia ka nuksa jong ka jingthaw ia ka Tripura Tribal Areas Autonomous District Council ha u snem 1983, ha kaba lai tylli ki District la wanrah hapoh ka Sixth Schule. Ki seng ki la rai ban buh thikna ia kine ki jingkynthoh ha khmat ka sorkar Assam bad ka Centre.
Kum shi bynta jong ka prokram jingiakhih, la pynbna ïa ka jingïakhih shong kyllain mungor paidbah lang ha Guwahati ha ka 19 tarik u kyllalyngkot, bad ka jingïakhih pyrshah ha Jantar Mantar ha New Delhi kan bud ha ka 5 tarik u Rymphang, ha kaba yn ïashim bynta da ki sengbhalang kiba don ha ka kyrdan jong ka ri kiba mihkhmat ïa ki lai jaitbynriew.
Ki seng bhalang ki la rai ruh ban aiti ïa ka memorandum sha u Myntri kam pohïing ka sorkar pdeng u Amit Shah ha ka por ba u thmu ban leit jngoh ïa ka tamasa Mising ha Kareng Chapori ha Bogibeel ha kaba kut jong une u bnai, da kaba kyntu ïa ka Centre ban tuklar bad pynbeit ïa ki jingdawa jong ki.
La thaw ia ka coordination committee ki kynthup ia ki nongmihkhmat na baroh lai tylli ki jaitbynriew ban pyniaid ia ka jingiakhih langne ka joint movement. Ha kane ka sngi la thung ia u Kiranban Deori, u Milan Sonowal bad u Prafulla Thengal (Saikia) kum ki convener jong kane ka komiti.
Haba kren sha ki lad pathai khubor, u Milan Sonowal u la kdew ba ki shnong kiba kham duna bha ki briew la ïoh ïa ka kyrdan Sixth Schedule ha ki por ba la dep. U la ai nuksa na Mizoram, ha kaba ia ka jaitbynriew Lakher, kaba don kumba 25,000 ngut eiei, la ioh ia ka kyrdan autonomous naduh u snem 1952, ryngkat bad ki thain Chakma bad Mara.
U la kdew ruh ia ka Tripura, ha kaba la thaw ia ka autonomous district council ha u snem 1982 wat la ka jingbun briew ka kham duna haba ianujor bad ka jylla.
Haba kylli ia ka jingmut jong ka sorkar, u Sonowal u la ong ba ka jaitbynriew Sonowal Kachari, kaba don palat saw lak ngut, ka jaitbynriew Deori, kaba don jan ar lak ngut ki briew, bad ka jaitbynriew Thengal Kachari, kaba don palat shi lak ngut, ki shah kyntait ia ka jingiada kaba dei hok jong ki, katkum ka riti synshar ka ri. Shuh shuh u la kdew ruh ba ki thaiñ kum ka Khasi Hills, Jaiñtia Hills bad Garo Hills la pynrung hapoh ka Sixth Schedule watla ki kham duna ka jingbun briew.
U nongialam jong ka Kiranban Deori bad u Dr Abdul Deori u la kynthah ruh ia ka sorkar kaba buh hakhmat eh tang ia ki jaidbynriew Mising, Tiwa bad Rabha katba ki iehnoh ia ki kynhun Sonowal Kachari, Deori bad Thengal Kachari, watla ki iajan ha ka jaka bad ki don lang ka jingsngewkhia.
Ki la pynpaw ia ka jingsngewkhia kaba jur halor ka jingkynnoh ba don ki briew kiba nabar ha ki jaka jong ka Tribal Sub-Plan bad ki la maham ba ki lai tylli ki jaidbynriew kin iatreilang ban pynjur ia ka jingiakhih jong ki ha ki sngi ban wan. Ki nongïalam ki la maham ruh, khamtam ha Upper Assam, ym dei ban pynrung bakla ïa kino kino ki jaka tynrai jong ki jaitbynriew ha ka jingsynshar jong kiwei pat ki thaiñ jong ka Sixth Schedule, wat lada khlem da tip.
