Shillong, K’lyngkot 9: U Myntri ka Sorkar bad MLA ka UDP na Amlarem Bah Lahkmen Rymbui ula pynpaw ia ka jingsngewkhia halor ka jinglong jingman hapoh ka ri Bangladesh, khamtam ba kane ka Ri kan leit sha ka elekshon ha u bnai Rymphang ban wan.
“Ngi kwah ba ka jingsuk kan synshar hapoh ka ri Bangladesh bad ngi kyrmen ba ka sorkar ban wan, kan ialeh ban pynthikna ban don ka shongsuk shongsain ha ka thain khappud hapdeng ka ri India bad Bangladesh, ban plie lad ban pyniaid shakhmat biang ia ka khaii pateng” ong u Bah Rymbui.
U Bah Rymbui ula pynshai ba ka jingbym don ka shongsuk shongshngain ha ka ri Bangladesh kala ktah ia ka bha ka miat jong ki samla pule ka Meghalaya kiba leit ban pule ha ka liang ka koit ka khiah, ha ki ri kiba don marjan.
“Kano kano ka jingeh ha ri Bangladesh kan ktah ia ngi, khamtam eh ia kito ki samla kiba leit pule ha ka liang ka koit ka khiah ha katei ka jaka. Ngi kyrmen ba ka shongsuk shongsain kan synshar biang bad ban pynthikna ia ka jingshngain ka jongki” ula ong.
Haba kubur ia ka histori jong ka jingiadei bad ka Sylhet, Bangladesh bad ki bynta jong ka Meghalaya, u Bah Rymbui ula banjur ia ka jingkongsan ban iada ia ka bha ka miat jong ki rit paid.
“Ngi ainguh ia u Blei ba ka don ka jingsuk ha ki jaka kiba don bun ki Khasi-Pnar bad ula kyntu ia ka sorkar ban wan, ba kadei ban iada ia ka hok jong ki rit paid” ula ong.
U Bah Rymbui ula kyntu ba dei ban long kiba peitngor hapdeng ki nongshong shnong kiba sah ha khappud bad ban ai ka jingiatreilang bad ki bor kiba dei khmih ban tehlakam ia ka jingwan rung be-aiñ.
“Nga kyntu ia ki nongshong shnong ba kidei ban pyntip sha ki shipai BSF bad ki pulit haba ki suba sniew ia kino ki kam bad ula kyntu ia ki bor shipai ba kidei ban long kiba peitngor bha” ula ong.
Halor ka jingsngewkhia ia ka jingwan rung be-aiñ, u Bah Rymbui ula kubur ba ki don ki jingeh namar ba kala don ka jinghiran hynrei ula iaroh pat ia ki nongshong shnong kiba la peitngor ban iada na ka jingwan rung be-aiñ.
“Ban don ia ka jingiatreilang ka long kaba kongsan tam ha kaban teh lakam ia ka jingwan rung tuh sha ka jylla ka jong ngi bad ha ka ri” ula banjur.
