Shillong, K’lyngkot 05 : Arngut ki briew la kynnoh ba kila iap na ka jingpynbthei bomb dynamite ban tih ia u dewiong na ka par dewiong beain kaba don ha ka shnong Thangsko, East Jaintia Hills District.
Kat kum ka khubor bala ioh dier por, kane ka jingjia kala jiaha ka 23 tarik Nohprah, kaba la wanrah ruh ia ka jingmynsaw ia bun ngut ki briew.
Watla ki bor Sorkar kim pat pynthikna ia kaei kaba jia ha kane ka jingjia, ka khubor ka iathuh ba uwei u briew ba suba nong Bangladesh, ula iap ha kane kajuh ka sngi.
Katba uwei pat ba la tip kyrteng u Ashok Tamang ula iap hadien ka jingsumar ia ki jingmynsaw ha Shillong Civil Hospital. Une u briew ula iap ha ka 1 tarik Kyllalyngkot.
Ka khubor ka iathuh ba kane ka jaka bala tip kum ka nongkynti ‘Sorkari’ ka don ia bun ngut ki trai kiba tih dewiong beain da kaba ai bylla ia ki nong Bangladesh. Kane ka dei ka buit ban tap eit miaw namar ia kine nongbylla lah ban phah leit phai biang shala ri ha kano kano ka por ba mih kano kano ka jingjia.
Ki briew kiba mynsaw ruh ia kiba suba jur ba ki dei ki nong Bangladesh, la dep ban phah leit phai ia ki shala ka jong ka ri.
Ki video bala ioh, ki pyni ba bun na kine ki nongtih dewiong kila ing na ki durkhmat, ka ryndang bad ka met ka phad.
