Guwahati, Nohprah 30: Ki Pulit ka Assam kila ioh ban pynpra noh ia kawei ka jaka treikam jong ki Jihadi kaba trei kam hapoh ka jylla bad la kem ruh ia 11 ngut ki briew kiba la shah kynnoh ba ki donkti ha ki kam lehnoh bad ki kam pyntriem.
Ia kine ki briew kiba la shah kem la tip kyrteng kum u Nasim Uddin ba ju khot sin kum u Najimuddin bad kum u Tamim (24), Junab Ali (38), Afrahim Hussain (24), Mizanur Rehman (46), Sultan Mehmud (40), Md Siddique Ali (46), Rasidul Aalam (28), Mahibul Khan (25), Sharuk Hussain (22), Md Dilbar Razak (26) bad u Jagir Miah (33).
Ki bor pahara bad ki tnad syntiat kila buddien bha ïa ki kam Jihadi ha ka thaiñ shatei lam mihngi ka ri India, ha kaba kila pynleit jingmut bha ha ka jylla Assam. Da kaba leh katkum ki jingtip ba la iohlum na ki tnad syntiat jong ka sorkar pdeng, ki Pulit ka Assam kila lap ïa ki kam jong u Imam Mahmuder Kafila (IMK).
Ka IMK kadei ka tnat jong ka Jamaat-ul-Mujahideen Bangladesh kaba don ha Bangladesh, kaba dei ka seng lehnoh ba la khang pyrshah ha India. Ia katei ka kynhun la seng ha u snem 2018 da u Jewel Mahmud ba la sin kum u Imam Mahmud Habibullah ba la sin ruh kum u Sohail, uba dei u dkhot barim jong ka JMB uba kam ba udei u ‘Amir’ jong ka IMK bad uba pynphriang ia ka rukom pyrkhat jong ka “Ghazwatul Hind”.
Ki nongtohkit kila ïoh jingtip ba hadien ka jingkylla ka jingsynshar ha Bangladesh ha u Nailar 2024, ki nongïalam ba rangbah jong ka JMB, ka Ansarullah Bangla Team bad ka Al-Qaeda ha Indian Subcontinent kila bthah ïa ki nongïalam ka IMK ban pyntreikam bad pyniar ïa ka buit treikam jong ka hapoh ri India.
Kum shi bynta jong kane ka jingpyniar, la ai kam ia arngut ki nong Bangladesh ia u Umar bad u Khalid ban pyniadei ia ki kam jong ka IMK ha Assam. Ia kine ki jingtreikam la pyndonkam ia ki lyngba ki rynsan social media kiba shngain.
Kawei na kum kine ki rynsan, kadei ka kynhun kaba la ai kyrteng ‘Purva Akash’, kaba la treikam kum ka lad ba kongsan jong ka jingïakren, ka jingpynrung dkhot bad ka jingpynlong ïa ki riew ialeh pyrshah. Lyngba kane ka kynhun, la kynnoh ba ki riewshimet ha Assam, West Bengal bad Tripura kila shah pynrung dkhot, ka jingpynioh pisa bad shah pynïadei bad ka seng. Kane ka kynthup ïa ki nongbat Passport na India kiba la leit jngoh shwa sha Bangladesh bad ki dkhot barim jong ki seng lehnoh ba la khang pyrshah.
Ki nongtohkit kila ong, ba ka IMK ka pynpaw ïalade kum ka kynhun jong ki lehnoh ba shyrkhei kaba pynshong nongrim ha ki Ghazwatul Hind bad ka kyntiew ïa ka jingmut jingpyrkhat kaba ïadei bad ki seng Jihadi ba la khang pyrshah. Hadien ka jingkylla ka sorkar ha Bangladesh, la iathuh ba ki dkhot jong ka JMB, ABT bad AQIS ki la shah pynshlur, kaba la pynlong ia ka jingpynmih biang ia ka jingktah jongki ia ka jingmut jingpyrkhat bad ki jingiadei jong ki nong India lyngba ki rynsan kiba iadei bad ka IMK.
La kynnoh ba kane ka kynhun kala pynsaphriang ïa ki jingpynbna ba shyrkhei kiba kyrshan ïa ka Jihad ba shyrkhei bad ka jingjop thma ïa ka ri India lyngba ki rynsan ‘Digital’ kynthup ïa ki website bad ki social media hapoh ka lama jong ka Ghazwatul Hind. Ki kot kiba shyrkhei kiba la thoh da ki nongïalam jong ka IMK kiba kynthup ïa ka ‘Sarbobhoumo Khamatar Malik Allah’ bad ka ‘Ghazwatul Hind er Sonkhipto Alochona’ la pynsaphriang ha ka online ban hikai ïa ki shipai.
Ha Assam, ïa kum kine ki jingthoh la sam nyngkong eh lyngba ka rynsan ba la buhrieh ‘Purba Akash’, la ong ki pulit.
La register case pyrshah ïa une u nongshah kynnoh hapoh ki kyndon aiñ 143, 147, 148, 149, 150, 152 and 113(5) jongka Bharatiya Nyaya Sanhita (BNS), 2023, ryngkat bad ka Section 10, 13, 16, 38, 39 bad ka 40 jong ka Unlawful Activities (Prevention) Act (UAPA), 1967.
Ki pulit ki la iathuh ba ka jingtohkit ka dang iaid shakhmat ban lap ia kiwei pat kiba donbynta bad ka IMK.
