Shillong, Nohprah 30 : U Symbud Myntri Rangbah ka Jylla ba khmih ia ki kam Pohiing (Police) Bah Prestone Tynsong, u pyntip ba ka Sorkar Meghalaya Democratic Alliance (MDA) kala kyrpad ia ka Sorkar Pdeng ba kan pynrung ia ki kyndon ILP ka ban long kyrpang tang ia ka Meghalaya ha ka Immigration and Foreigners Act, 2025.
Lah ban kdew ba u Myntri Rangbah ka Jylla Conrad K Sangma lem bad u Symbud Myntri Rangbah Bah Prestone, kila iakynduh dang shen ia u Myntri kam Pohiing ka ri Amit Shah, ha New Delhi ban iakren ia bun ki kam ka Jylla kynthup ka jingpynrung ia ki kyndon ILP ba long kyrpang ia ka Meghalaya ha ka Foreigners Act 2025.
“U Myntri kam Pohiing Amit Shah, ula ai ia ka jubab kaba sngewtynnad ia kane ka jingtyrwa jong ka Jylla” ong u Bah Prestone haba iakren bad ki nongthoh khubor.
Ula batai “Ngi la iakren kumno ka Immigration and Foreigners Acr, 2025 ka lah ban iakhleh lang bad ki kyndon ka ILP, ka ban pynlong ia ka ILP ba kan treikam ha Meghalaya. Ka jingiasyllok bad u Myntri kam Pohiing ka long kaba sngewtynnad”.
U pyntip ba u Amit Shah ula bthah ia u Home Secretary ka Sorkar Pdeng ba un khot ia ka jingialang bad u Chief Secretary ka Jylla Meghalaya lem bad ka Director General of Police (DGP) ba kin pynkhreh ia ki jingdonkam ha kaban pynbna ia ka Meghalaya kum ka ‘Protected’ lane ‘Restricted Area’ hapoh ka Act ba thymmai.
“Lehse ha ka taiew ban wan, u Home Secretary un sa khot ia ka jingialang bad u Chief Secretary lem bad ka DGP ban iasyllok bad pynkhreh ia ki kyndon ba donkam ha ka ban pynbna ia ka Meghalaya kum ka ‘Protected’ lane “Restricted Area’ ha kane ka Ain ba thymmai” ong u Bah Prestone.
U Bah Prestone ula batai kham bniah ba kane ka jingtyrwa pynkylla ka long ban bsuh lang ia ki kyndon kiba syriem bad ka ILP, ka ban pynlah ia ka Jylla ban pyrrkhing ia ki briew ba nabar-la ka dei ki nong India ne Nongwei- ba kin hap shim permit hashuwa ba kin rung sha Meghalaya.
Ula pynpaw “Ha kane ka Immigration and Foreigners Act, 2025, ngi tyrwa ban pynrung ia ka kyndon ba iasyriem bad ka ILP ban pynkha ia ka ‘Protected’ lane ‘Restricted Area”, ka ban aibor ia ka Jylla ba kan ai permit ia ki briew ba nabar hashuwa ba kin rung, kumba leh ha Arunachal Pradesh. Kino kino kiba wan sha Jylla hapoh kane ka Ain, kin hap ban register online lyngba ki facilitation centre ha ki entry point”.
Ula bynrap ba kane ka Ain ba thymmai kan kham treikam bha ban ia ka ILP ba mynta ha kaban tehla kam ia ka jingrung ki mynder ri khamtam haba ka Meghalaya ka don haduh 444 Km u khappud bad ka Bangladesh.
Haba kylli, la ki kynhun iakhun mynder ri kin pdiang ia kane ka jingtyrwa, u Bah Prestone ula jubab “Mano ban nym pdiang?. Ka jingshisha hi ka long ba kane ka jingtyrwa ba thymmai ban bsuh ia ki mynsiem jong ka ILP ha ka Immigration and Foreigners Act ka kham khlain bor bad kham treikam bha ha kaban iakhun pyrshah ia ka jingrung kyrteng ki briew ba nabar bad ki mynder ri hapoh ka Jylla”.
U Symbud Myntri Rangbah ula pynpaw ba ka sienjam kaba bud ka kynthup ia ka jingialang hapdeng u Home Secretary ka Sorkar Pdeng bad u Chief Secretary ka Jylla lem bad ka DGP ban iapynbeit ia ki jingdonkam baroh.
U ong “Lada ka Sorkar Pdeng ka mynjur ban pynrung ia kane ka kyndon, ka Immigration and Foreigners Act kan long kum ka ILP ha Meghalaya. Lada ki pdiang ia ka jingtyrwa, kan ym donkam shuh ban don da kiwei pat ki ain, ngi lah ban pyntreikam pura ia ka Immigration & Foreigners Act ha ka jaka ka ILP”.
Kat kum ka jingong jong u, kane ka jingtyrwa, lada mynjur, kan ai ia ka bor ia ka Meghalaya ba kan pyrrkhing ia ka jingwan rung ki nongwei bad kumjuh ruh ki nong India, kaba ki hap ban donkam ban pynrung kyrteng ha ka por ba ki wan poi.
 Bah Prestone Tynsong, u pyntip ba ka Sorkar Meghalaya Democratic Alliance (MDA) kala kyrpad ia ka Sorkar Pdeng ba kan pynrung ia ki kyndon ILP ka ban long kyrpang tang ia ka Meghalaya ha ka Immigration and Foreigners Act, 2025.){kind=link}