Shillong, Dec 29 : Ka All Meghalaya Karate-Do Association (AMKA) kala rakhe ia ka jingdap 44 snem da kaba pynlong ia ka jingialang bad ka jingpynkup burom ia ki nongialehkai Karate kiba la ioh Black Belt, kiba la ioh khur takma, ki Coach bad Nongpyniaid kiba la wanrah nam bad burom ia ka Association bad ia ka jylla baroh kawei ha kine ki snem kiba la leit.
Kane ka jingialang kala long ha ka 23 tarik u Nohprah ha Khasi National Dorbar Hall, Mawkhar ha kaba la iadonlang ki nongialehkai karate, ki nonghikai, nongpyniaid bad ki dkhot jongka AMKA.
La sam ia ki certificate sha ki 22 ngut ki nongialehkai Karate kiba la pyndep ban ioh ia ka 1st Dan bad 2nd Dan Black Belt, kaba long u mawjam uba kongsan ha ka lynti iaid jong ka jingialehkai Karate bad ban ithuh ia ka jingtrei shitom ka jongki bad ia ka jingbatskhem ia ka jingkular.
Ha kane ka prokram ka kynthup ruh ia ka jingpynkup burom ia ki nongjop ha ki rynsan ka ri bad shabar ka ri ban ai jingithuh ia ka jingtbit ka jongki bad ia ka jingjop ka jongki ha ki jingiakob ki bapher bapher.
La pynkup burom ruh ia ki coach bad ki official kum ka dak jong ka jingai burom ia ka jingnoh synniang ka jongki bad ka jingaiti met bad mynsiem ha ka jingshakri na ka bynta ka jingroi bad jingkiew jong ka jingialehkai Karate ha Meghalaya.
La ioh ia ka jingkren maitphang na u President ka AMKA bah Hunlang Lytan uba la batai shaphang ka jingiaid lynti kaba 44 snem jong kane ka kynhun bad ka jingiai bteng ban noh synniang ha kaban kyntiew ia ka jingialehkai Karate ha Meghalaya bad ula banjur ia ka jingkordor jong ka jingdon akor, ka jingaiti bad ka jingiatylli jongka AMKA kaba kala bat bad pynneh mynta la bun phew snem.
Hadien kane la ioh ia ka kaiphod treikam bad ia ka histori na u General Secretary ka AMKA u Ksan Kupar Warjri uba la pynpaw ia ki mawmer jong ka jingjop ka AMKA ha kine ki 40 snem kiba la dep bad pynkynmaw ruh ia ka jingiohi jngai jong u nongseng ia kane ka Association u (late) Sensei Stephan Leong, uba la sdang bad pyntreikam nyngkong eh ia ka Karate ha Meghalaya.
U General Secretary ula kyntu ia ki khynnah ba kidei ban kynmaw bad ban bud ia ki jinghikai kumba la buh da u Stephan Leong bad ka ong ba kitei ki nongrim kin iai bteng ban btin ia ki ban poi sha ka jingjop bad ula pynkynmaw ba une u nongseng ula pynmih ia ki nongialehkai Karate kiba la pawnam ha ka pyrthei kiba la wanrah nam bad burom ia ka jylla bad ia ka ri kiba kynthup ia u Bah Banshanlang Kharumnuid, Bah Donboklang Lyngdoh, Bah Damang Syngkon, ka Kong Linza Syiem bad kiwei kiwei.
Ban pynshongkun ia kane ka jingrakhe ki nongialehkai Karate kila pyninam ruh ia ka sap ka phong ka jongki, kaba kynthup ia ka jingrwai bad jingshad ia kaba kila ioh ia ka jingiaroh na kiba wan peitkai.
1st Dan Karatekas: Dr Raktim Suraj D, Abhradeep Aguan, Samebanmerbha S Blah, Badapkupar Nongkynrih, Sandamika V Langstieh, Jake Damian Syiemiong, Emmanuel Bapynkmeniame Diengdoh, Badondor Ryntathiang, Aibiangpormika L Mawphlang, Aibiangmisaka L Mawphlang, Daniel Dabiangbha Warjri bad Carenia Rapthap.
2nd Dan karatekas: Sweety Ranee, Damebanmerbha S Blah, Bhawanchwadamae L Mawphlang, Gregorwilson Makdoh, Impera Makdoh, Gideon Tympuin, Ferdinand Samkupar Rani, Lamerphylla Kharsati, Laiarisa Nongrum bad u Aventinus G Mylliemngap.
 kala rakhe ia ka jingdap 44 snem da kaba pynlong ia ka jingialang bad ka jingpynkup burom ia ki nongialehkai Karate kiba la ioh Black Belt, kiba la ioh khur takma, ki Coach bad Nongpyniaid kiba la wanrah nam bad burom ia ka Association bad ia ka jylla baroh kawei ha kine ki snem kiba la leit.){kind=link}