Shillong Nohprah 23: Kumba 83 ngut ki samla shynrang bad kynthei jong ka thain Lyngkyrdem, kiba la pyndep ia ka jingioh jinghikai pyntbit kum ki Home Guards Volunteers bad ioh pdiang ia ka syrnod kum ka jingithuh da ka Sorkar ha ka sngi Balang.
U Symbud Myntri Rangbah ka Jylla Bah Prestone Tynsong ula leit jngoh ia kine ki Home Guards Volunteers bad ula shim ia ka bynta ban ai salute ia kine ki samla kynthei bad shynrang kiba la iashimbynta ha ka jingiaid parade ha Madan jong ka Shnong Laitlyting, Pynursla Constituency.
U Bah Prestone ula iaroh ia kine ki 83 ngut ki samla kiba la pyndep ia ka jingioh jinghikai ha ki liang bad ki bynta ki bapher bapher bad ula pynpaw ia ka jingsngewtynnad ban tip ba kane ka dei kawei na ki kynhun kaba tbit tam bad kaba don ia ka jinglong ryntih bad ia ka akor kaba bha bad ula kyntu ia kine ki samla ba kidei ruh ban long ka nuksa na ka bynta kiwei pat.
“Nga kyrmen skhem ba kin sa shah pynrungkam bad shakri ha kylleng sawdong ka jylla jong ngi” ong u Bah Prestone haba bynrap “Ha kano kano ka jaka kaba phi don, rah ia ka nam jong ka Pynursla Constituency bad ia ka Raid Langkyrdem khnang ba phin long kiba iwbih bad ba phin pyniwbih lang ia kiwei kiwei ki dong bad ki thain jong ka jylla Meghalaya ka jong ngi”.
Ula ai khublei ia ki nongialam shnong bad ia ki heh jong ka tnad Home Guards kiba la shimkhia ban pynlong ia kane ka jingai jinghikai ia kine ki samla kaba seisoh bad ula ong ba kane ka jingai jinghikai ka dang dei tang ka jingsdang haba kyrmen skhem ba kane ka thain kan dang lah shuh shuh ha kaban pynmih ia ki Volunteers kiban noh synniang ia ka jylla bad ia ka ri baroh kawei.
U Joint Director jong ka Home Guards Bah B Mukhim ula ong, ba kane ka kynhun ka dei kaba tbit bha, kaba la trei met bad mynsiem bad kaba don ia ka akor bad ka long kaei kaei kaba hap ban ai jingiaroh ba kine ki samla kidei kiba la bit la biang bha ban shah pynrung ha kano kano ka kam.
Kine ki samla kila pyndep ia ki jinghikai halor ka Arms Drill, Foot Drill, Civil Defence Training, Disaster Management haduh ka Firing ne jinghikai siat kaba kila pyndep ha 1st MLP Batallion, Mawiong.
Nalor kane ula iathuh, ba lah bun snem ki Home Guards kiba leit trei ha ka tnad Traffic ne Fire and Emergency Service kila mad ia ka jingeh man la ka por namar ka jingslem ban ioh ia ka tulop, hynrei dei lyngba ka jingshimkhia u Symbud Myntri Rangbah ka Jylla uba la lum kyrkieh ia ka jingialang jongki heh pulit bad Home Guards ban pynbeit ia katei ka jingeh bad mynta um don shuh wat tang uwei u Home Guards u ban ym ioh tulop.
