Shillong, Nohprah 20: Ka jingangnud ba la palat 40 snem jong ki paidbah na ki ar tylli ki shnong ka 19 South Shillong Constituency, khatduh khatwai ha ka jinglong nongmih khmat u Bah Sanbor Shullai ula lah ban pynurlong-kaba long ruh kum ka jingai sngewbha Khristmas bad snem thymmai ia kine ki shnong.
Kine ki ar tylli ki shnong ki kynthup ia ka shnong Kynjat phutbol bad kawei pat ka dei ka shnong Lumshadsngi, kiba hap hapoh jong ka Raid Laban.
Kane ka jingurlong ka dei lyngba ka jingplie paidbah ia ka jingbuh ia u maw nongrom ban shna surok ha kitei ki ar tylli ki shnong kiba kynthup ïa ka surok ka ban shna ïa ka Feeder Road na ka jaka jong ka PWD kaba don hajan ka ïing jong ka kong Ester Bareh ka ban pynïasoh na Madanrit kaba dei ka surok kaba don mynta shaduh Umkynrut LP School Riat Laban Kynjat phutbol (Phase 1).
Ia kane ka surok la ïoh jingmang tyngka lyngba ka SPA scheme 2025-26 ha ka dor kaba T. 95.03 lak kaba la shim khia hi da u MLA ban pynïoh ïa kane ka jingmang tyngka na ka sorkar.
Sa u wei pat u maw nongrim ba la buh kadei na ka bynta ban shna ïa ka surok PWD kaba kynthup ruh ïa ka jingpynheh bad pyniar, bad ka jingbuh ïa ka Aqueduct Dranage System, ia kaban najan jong ka skul Neplai shapoh ban poi sha Seng Khasi.
Haba kren ha kane ka jingialang u Bah Sanbor Shullai ba ka jingangnud ki paidbah jong kine ki shnong kala kynjoh shaduh u saw phew snem bad MLA ki leit bad ki wan hynrei tad ha ka por jong nga la lah shisha ban pynurlong ia kane ka jingthrang bad ka jingangnud.
Kine ki surok kin long ka jingmyntoi lang jong ki paidbah kiba mad jingeh ha ki rukom bapher bapher ba kynthup ïa ka jingdonkam ha ka ïap ka im, bad kiwei kiwei ki jingdonkam.
Shuh shuh u Bah Sanbor u la ong ruh ba ka jingïoh ïa ka surok ka long kaba kongsan bha na ka bynta ki nongshong shnong kiba la mad ïa ki jingeh na ka por sha ka por.
“Hapdeng ka jingioh ia kine ki jingmyntoi, hynrei phim dei pat ban klet ia u briew uba la leh bha ia phi namar ba lada phi shet kylla ha ka por ba u nongleh bha ia phi u donkam kan sa long ka jingduh kaba khraw ia ka shnong ka thaw” ong u Bah Sanbor.
Shuh shuh u la kyntu ia ki paidbah nong shong shnong ba kim dei ban ia shongshit ruma ban ia leit shad sadhai tang namar ba shongshit bad ha kaba kut, yn dei hi u Bah Sanbor ban phah ki kali kit nongpang ban phah leit shah sumar namar ba u nongpynshit u la her lai lum lai wah.
