Guwahati, Nailur 20 : Arngut ki khynnah kynthei kiba dei shipara kila ngam jyllop noh hapoh kawei ka pung katba ki dang leit ban khwai dohkha hapoh Darrang district ka Assam, ong ka khubor pulit.
Kane ka jingjia kala jia hynnin ka sngi Nyngkong ha ki bynta jong ka Simamuria Bhakatpara kaba hap hapoh Darang district.Ia kine ki lanot la tip kyrteng kum ka Silsina Marak bad ka Martina Marak.
Na ka liang u heh pulit ula ong ba kine ki arngut ki shipara kynthei kila leit sha katei ka pung kaba don hajan ka iingsah jong ki ban khwai dohkha hadien ba kane ka jingjia ba sngewsih kala wan jia.
Hadien slem slem ba kim shym la wanphai shuh sha la iing, kumta na ka liang kiba haiing hasem kila leit ban wad ia ki.Ha kaba nyngkong kila nang tharai ba kine ki khynnah kila shah rahbor noh, hynrei hadien kila suba ba lehse kila ngam jyllop hapoh katei ka pung.
Kumta mar ia poi ha katei ka jaka kila lapdien ia ki metiap jong ki na katei ka pung. Na ka liang ki pulit kila ong ba lehse kane ka jingjia kala wan jia hadien ba kine ki khynnah kila syntuid bad ngam hapoh katei ka pung.
Hadien kane la pynkit noh mardor ia kine ki arngut shapoh hospital hadien ba ki doktor kila pynbna ba kila dep khlad noh.
Ha kaba kum kane ka juh ka jingjia, argut ki khynnah samla kila duh ei la ka jingim hadien ba kila ngam jyllop noh hapoh ka wah ha ki bynta jong ka Jogighopa kaba hapoh Bongaigaon district ka Assam ha une u bnai ba la dep.
