Shillong, Nohprah 17 : Ka Ministry of Road Transport & Highway (MoRTH) ka Sorkar Pdeng, kala kular ia ka Sorkar Meghalaya ba kan sa thaw ia ki lad ki lynti ban lah shna pyndep ia ki surok ka skhim Special Accelerated Road Development Programme-NE (SARDP-NE) kiba sahteng ha Jylla namar ka jingpynkut ia ka skhim.
Ia kane ka jingkular la ai da u Myntri ka MoRTH Nitin Gadkari ha ka jingiakynduh bad u Myntri Rangbah ka Jylla Conrad K Sangma lem bad u Symbud Myntri Rangbah ba khmih ia ka Tnad PWD Bah Prestone Tynsong, ha ka jingiakynduh ba long ha ka sngi Ba-ar ha New Delhi.
Haba iakren bad Ka Shlem hadien ba wan phai na Delhi, u Symbud Myntri Rangbah u pyntip ba ka Sorkar Pdeng kala pynkut noh ia ka skhim SARDP-NE bad kane kala buh ha ka jingeh ia ka Jylla ba kan lah trei pyndep ia ki artylli ki project surok jong kane ka skhim-ka surok Nongstoin-Wahkaji-Phlangdiloin-Ranikor bad ka surok Nongstoin-Rambrai-Kyrshai ka ban pyniasoh bad ka Chegaon, Assam.
U Bah Prestone u pyntip ba ia ka wat ba nyngkong jong kine ki project lah dep ban pyntrei hynrei dei ha ka wat ka ba-ar kaba sah namar ka jingpynkut noh ia ka SARPD.
“Ngi la kyrpad ia u Myntri ka Sorkar Pdeng ban pynrung noh ia kitei ki artylli ki project ha kano kano ka skhim khnang ban ioh shna pyndep noh-ki ban ai shibun ki jingmyntoi bad pynsuk ia ka leit ka wan ki paidbah” ula ong haba pyntip ba u Myntri ula ai ka jingkular ban sa wad ia ki lad ki lynti ban pynioh skhim ba kyrpang ia kine ki artylli ki surok.
U Bah Prestone u pyntip ba ha kane ka jingiakynduh, la iakren ruh halor ka surok High Speed Corridor ka ban sdang na lad Umroi, Umiam sha Malidor bad u Myntri ula pyntip ba ula dep bthah ban pyndep kloi noh ia ka sorjamin jaka khnang ban ioh shna DPR bad ban khot tender noh.
“Ngi la iakren ruh ia ki bynta jong ka surok hajan ka ICAR kaba don ia ka Botanical Survey of India (BSI) bad ka Botling Plant ka Indian Oil Corporation” ula iathuh haba pyntip ba u Secretary ka MoRTH un sa lum ia ka jingialang bad ka BSI lem bad ka IOC ban pynbeit ia kane ka kam.
Nalor kane, u pyntip ba ka Sorkar kala rah iakren ruh ia ka mat ba iadei bad ka jingshna ia ka jingkieng ha wah Brahmaputra ka ban pyniasoh bad ka Phulbari. Kane ka jingkieng kan hap ha ka surok 4-Lane kaba pyniasoh ia ka West Bengal bad ki jaka ri thor ka ri-lum Garo.
“Kane ka jingkieng kan dei kaba jrong tam ha ri India, kaba dei ka 4-lane. Ka jingpyntrei kala jan dep artad ban poi haduh ha Phulbari. Ka jingeh hangne ka long ba ka Phulbari ka don ia ka surok kaba rit bad ngi la kyrpad ban pynkylla noh ia ka surok Phulbari sha ka 4-lane”ong u Bah Prestone haba iathuh ba u Nitin Gadkari ula bthah ia u Secretary ka MoRTH bad ia ki Ophisar ba kin khmih bniah ia kane ka jingtyrwa.
Ka Fly-Over ha Shillong ruh ka dei ka mat kaba la mih ha kane ka jingiakynduh bad la iakren ia ka jingdonkam ban pynpoi ia ka Fly Over haduh Barik Point, kaba mynshuwa la tyrwa ban pynkut tang ha Anjali Point.
“U Nitin Gadkari ula bthah ia ki Ophisar ka NHIDCL bad ia ka Ministry ba kin bishar bad leh ia kaba donkam khamtam ba bun na ki jaka jong kane ka project ki dei kiba hap hapoh ka Defence Land” ong u bah Prestone haba pyntip ba ka NHIDCL kan sa shimkhia ia kane ka kam bad kan sa khot ia ka tender tang mar syn ioh shimti ia ki jaka.
 ka Sorkar Pdeng, kala kular ia ka Sorkar Meghalaya ba kan sa thaw ia ki lad ki lynti ban lah shna pyndep ia ki surok ka skhim Special Accelerated Road Development Programme-NE (SARDP-NE) kiba sahteng ha Jylla namar ka jingpynkut ia ka skhim.){kind=link}