Dang wad jaka ka Sorkar ban pynlong jaka theh niut thymmai
Shillong, Nohprah 18: U Symbud Myntri Rangbah ba khmih iaka tnat Urban Affairs Bah Sniawbhalang Dhar u la pynpaw ba ka jingpynkhuid ïa ki jaboh ba rim na Marten, Mawlai Mawiong kala treikam bha ha kaba palat 2 lak ton ki jaboh la dep ban pynkhuid.
“Na ka bynta ki jaboh thymmai, ngi dang hap ban pynkhuid. Katba ngi dang wad jaka ban tei jaka theh nuit thymmai, ngi hap ban pynkhuid lut shwa ia baroh ki jaboh ba rim katkum ka juk stad mynta” ong u Bah Sniawbhalang.
U Bah Sniawbhalang u la bynrap ba haduh mynta la dep ban pynkhuid palat 2 lak ton ki jaboh barim bad kaba sah mynta ka long satang 1.8 lak ton ki jaboh ba rim ba hap ban pynkhuid.
“Ha u snem bala dep ki jaboh kiba la lum ki don ym duna 3-4 lak ton, mynta palat 2 lak ton la pynkhuid bad lah ban pyndonkam biang, kumta lehse 1.8 lak ka dang don, bad kyrmen, hapoh ka por kaba lyngkot, ngin sa lah ban pynkhuid ïa ki jaboh ba la rim na Marten” u la ong.
U Symbud Myntri u la pynpaw ia ka jingsngewskhem ba ia ki kam yn pyndep hapoh ka por ba la buh, kumba la iasoi ha ka Tender. “Nga thikna bha ba kin lah ban pyndep ia ka jingpynkhuid ia ki jaboh barim na Marten hapoh ka por ba la buh katkum ka jingiateh soskular haka Tender.”
U la ai khublei ia ki nongshong shnong kiba la ai ka jingiatreilang bad jingkyrshan ha ka jingpyrshang ban pynkhuid ia ki jaboh.
“Nga ai khublei shibun ia baroh ki shnong namar ngi la leh ia ki prokram pynsngewthuh na ka tnat, bad ki iatreilang bha. Ngi ai khublei shibun ia baroh kito ki shnong kiba long shi bynta jong ka jingthmu ban pynlong ia ka sor kaba khuid.”
U la kyrpad ia ki paidbah ban bteng ban pyniakhlad ia ki jaboh kiba pyut bad ki bym pyut, da kaba ong, “Ngi la buh bun ki Centre ba don ki mashin kiba thymmai ban pyniakhlad ia ki jaboh kiba pyut bad ki bym pyut, nga kyrpad ia ki paidbah ban pyniakhlad ia ki jaboh. Kum kine ki sienjam ba rit kin iarap haka khuid ka suba”.
