Shillong, Nohprah 17: U Myntri Rangbah ka Jylla u Conrad K. Sangma hynne ka sngi Balang ula ong ba ka long kaba kongsan ia ki shnong ki thaw bad ia ka sorkar ban iatreilang ban wanrah ia ka jingkylla kaba iar bad ka ban sakhi da baroh.
U Sangma ula ong ia katei haba plie ia ka jingplie ia ka jingpynkhuid bad jingpynitynnad ha ka shnong Mawlai Maroh.
U Conrad Sangma ula ong ba ka jingpynitynand ia ka sor kadei ka jingbteng ia ka jingpyrshang jong ka sorkar lyngba ka tnad Urban Affairs bad Municipal ban pynlong ia ka nongbah bad ki jaka khapsor kiba khuid, jyrngam, shngain bad kiba itynnad.
“Nga dap da ka jingkmen ban iohi ba ka jingpyrshang ka jong ngi kala iaid ha ka lynti kaba dei, da ka jingiashimbynta lang jong ki shnong ki thaw bad ka imlang sahlang” ula ong.
Ha kaba iadei bad ka jingialang kaba la dep long teng hapdeng ka sorkar jylla bad ki Rangbah Shnong bad kiwei kiwei kiba donbynta lang ha ka imlang sahlang na ka bynta ban pynitynnad ia ka nongbah, ha kaba bun tylli ki shnong kila pynpaw ia ka jingdonkam ban buh ia ki kor CCTV ha ki shnong, u Myntri Rangbah ula ong, “Kum ka jingbuddien ia katei ka jingialang, nga dap da ka jingkmen ban pyntip ba mynta ka sngi, ngi la plie ia ki kor CCTV bad na ki 45 tylli ki shnong kiba la dep ban ithuh, ha ka wat kaba nyngkong kan kynthup ia ki 25 tylli ki shnong kidei kiba la dep ban pyndep bad sa 20 tylli ki shnong yn sa pyndep noh shen”.
Ula pyntip ruh ba ka jingpyndait ia ki CCTV bad Street Lights kadei ka kam kaba dang iaid shakhmat bad yn sa kynthup shuh shuh ia ki shnong ha ka wat ka baar.
“Kam don kano kano kaba rit ne heh ka projek kam pynroi bad wat ka jingkylla kaba rit ruh ka lah ban wanrah ia ka jingkylla kaba heh bad ka jingiapher ha baroh kawei jingiaid jong ka kam pynroi” ula ong.
Ula ong shuh shuh, ba ka jingai jingshakri ka sorkar kan long kaba treikam bha haba ka don ka jingiakren bad ki shnong ki thaw bad ka jaka kaba plie ban don ia ka jingiakren bad jingmir jingmut, ha kaba ki Rangbah Shnong jong ki shnong bapher ha Shillong kin pynsngew shaphang ki shnong ki jongki ia ka jingdonkam ia ki Street Lights, CCTV, jaka pynieng kali, ka lynti iaid kjat ki paitbah, ka jingsam ia ka umbam, ka jingset jong ki nala bad kiwei kiwei.
U Conrad Sangma ula sam ruh ia ki song jingiarap sha ki shnong ban pynitynnad ia ki shnong ki thaw bad ula plie ia ka jingpyndait ia ki kor CCTV ha Mawlai Mawroh.
Hadien kane, ula leit ruh ban jngoh ia ka shnong Mawlai Iewrynghep.
Ha katei ka jingialang la iadonlang u Chief Secretary u Dr Shakil P Ahammad, u Director jongka Urban Affairs bad u CEO ka Shillong Municipal Board u P K Boro.
