Shillong, Nohprah 16 : Ka Sorkar Jylla kala kyntait ia ka jingdawa ban pyrrkhing ia ka jingwan kamai ki Tourist Taxi nabar ka Jylla haba kdew ba ka long ka bym lah ban leh kat kum ka ain.
Ha ka jaka kane, ka Sorkar kan sa lum ia ka jingialang ki Hotel, ki trai jong ki Resort, bad ki Tour Operator ba kin pynshlur ia ka jingpyndonkam ia ki Tourist Taxi na Jylla.
Ia kane ka rai la shim ha ka jingialang bala pyniaid da u Symbud Myntri Rangbah ba khmih ia ka Tnad Transport Bah Sniawbhalang Dhar lem bad ka kynhun ki nongialam ka All Khasi Meghalaya Tourist Taxi Association (AKMTTA) ha ka sngi Ba-ar.
“Ngi la ioh ia ka jingialang kaba seisoh bha, ka jingialang kaba sngewtynnad” ong u bah Sniawbha haba iakren bad ki lad pathai khubor.
Ka AKMTTA kala kyrpad ban pyrrkhing ia ka jingwan kamai ki Tourist Taxi ba nabar ka Jylla sha ki jaka jngohkai ba don ha kylleng ka Jylla, hynrei u Bah Sniawbhalang ula ong ba kane ka long ka bym lah satia ban leh kat kum ka ain.
“Kat kum ka ain, kam shong ain ban khang ia ki kali ba nabar ba kin wan sha ka Jylla, ki ia sngewthuh bha ia kane. U Advocate General (AG) ula pynpaw ba ka ain kam shah ban khang ia ki kali ba nabar ba kin wan sha Jylla” ula bynrap.
Hynrei, ka Sorkar kala mynjur ban kyrpad ia ki trai hoel bad ki tour operator ba kin iakren ia ki tourist taxi na Jylla.
“Ngin sa khot ia ki trai jong ki hotel, ki resort bad ki tour operator bad sa kyrpad ia ki ba kin pyndonkam ia ka jingshakri ki tourist taxi na Jylla” ong u Bah Dhar haba pyntip ba yn sa pynlong biang ia ka jingialang bad ka seng ki Taxi ha ka kyrdan jong ki Ophisar ka tnad Transport bad Tourism.
U Symbud Myntri Rangbah ula ban jur ia ka jingdonkamba ki nongpyniaid iaki local taxi ba kin bat ia ka jinglehkhuid bad ka jingdon ia ka akor ka burom.
“Ngi kyrpad ia ki tourist taxi na Jylla ba ki kali jong kim ki dei ban long kiba bha, kiba khuid bad ba ki nongniah ki dei ban long kiba don ka akor ka burom, khnang ba ki briew ba wan sha Meghalaya kin sngewtynnad bad kmen ia ka jingshakri jong ki” ula ong.
