Shillong, Nohprah 09: Ka Sorkar Pdeng kala pyllait ia ka T.95 Klur kum ka jingsiew ia ka bai lutksan ha ka jingpyntrei ia ka Package III (Pynurlsa Bypass) jongka jingshna ia ka surok Shillong-Dawki Road.
Ïa kane la pyntip da u Symbud Myntri Rangbah ka Jylla uba khmih ia ka tnad PWD (Roads) u Bah Prestone Tynsong hadien ba ula dep lum ia ka jingialang ia kaba la wan iashimbynta da ki heh jong ka National Highways and Infrastructure Development Corporation Limited (NHIDCL) hynne ka sngi Baar.
U Bah Tynsong ula pynbna ba ka jingsiew ia ka bai lutksan na ka bynta ka Package III, Pynurlsa Bypass, kadei kaba lah dep ban mang da ka Sorkar India, kaban kot kumba T.95 kaba la mang na ka bynta ka bai lutksan.
“Shen ka district collector jongka East Khasi Hills bad kumjuh ka SDO Civil Pynurlsa kin sa lah ban pyniaid ia ka kam bad pynkhreh ia ki jingtip jong baroh kiba donbynta ha ka kam bad ban pyllait ia ka bai lutksan lyngba ki bank account jong ki baroh” la ong u Bah Prestone Tynsong.
Ula pynpaw ia ka jingsngewhun halor ka jingiaid ka kam bad ia kiwei ki thup ne Package jongka Shillong-Dawki Road Project, u Bah Tynsong ula ong, “Nga sngewkmen ban pyntip ba ia ka Package I, II, IV, V, ka jingiaid ka kam ka long kaba sngewhun”.
Ha kaba iadei bad ka Package I, u Bah Tynsong ula pynbna ba ka NHIDCL bad ki kompani kiba pyntrei ia ka kam kila buh ia ka thong ban pyndep ia ka jingshna ia ka 4-lane haduh ha Baniun Pomlum hapoh ka 31 tarik u Nohprah 2025.
“Ngin lah ban pyndep ia ka, ki lah ban don ki mat kiba rit, hynrei kaba bun hi, kane ka 4-lane ka lah ban treikam noh hashwa ban kut noh une u bnai bad hashwa ban kut noh une u snem” ula ong.
U Symbud Myntri Rangbah ula pynpaw ba ka jingiaid ki kam jong ka Package II, IV bad V ka long kaba ihun, ha kaba la shim ia ki lad ki lynti ban pynthikna ba kan ym ktah ia ka mariang.
“La dep bthah sha ki kompani kiba dei khmih ban pynthikna ba dei ban bud ryntih ia ka jingbthah jong ka Meghalaya State Pollution Control Board” ula ong.
Ha kaba iadei bad ka jingshna ia ka Shillong-Western Bypass, u Bah Tynsong ula ong ba ki kam ki jam kila iaid bha katkum ka jingbuh por ban pyndep ha u snem 2026.
“Ka jingiaid ki kam ka long kaba biang bha, hooid ki katto katne ki bynta jong ka Package III, ngi lah don ia ki jingtynjuh ha kaba ki trai jaka, ka shnong kala don ka jingiakam trai ia ka jaka. Nga ngeit skhem ba hapoh katto katne taiew nangne, ka district collector kin sa lah ban pynbeit noh ia kane ka mat” ula bynrap.
 jongka jingshna ia ka surok Shillong-Dawki Road.){kind=link}