Shillong, Nohprah 9: U Myntri Rangbah ka Jylla Conrad K Sangma ha ka sngi Baar, ula ong, ba ka jingpynslem ka Sorkar pdeng ban pyllait ia ka T.700 Klur ka jingsiew sha ki kontraktor kiba pyntrei ia ki projek ka Jal Jeevan Mission (JJM) kadei halor ka rai ban pynsangeh shuwa ia ka jingpyllait pisa sha baroh ki jylla.
“Ka pisa na ka bynta ka JJM ka dei kaba la pynsangeh ha ka kyrdan jong ka sorkar pdeng na ka bynta baroh ki sorkar jylla. Kumta kam don kano kano ka jingpyllait ia ka pisa sha kino kino ki jylla kumba ka long mynta. Ym tang ha Meghalaya, hynrei ha ka ri hi baroh kawei” ong u Conrad Sangma.
U Myntri Rangbah ula batai ba ka JJM ka dei ka mishon kaba dei ban kut noh ha u bnai Lber 2024 hynrei ka kynhun myntri jong ka sorkar pdeng kala rai ban pynkut noh. Hynrei hadien, ka kynhun myntri kala shim ia ka rai ban pynjlan ia kane ka prokram kata hadien ba la dep ban pynlong ia ka jingkhmih bniah ia ka jingpynlut pynsep (audit) haba iadei bad ka jingpyntreikam ia ka skhim ha kylleng jong ka ri.
“Ka Sorkar Pdeng kala buh ia ki kyndon ba kan don ka jingkhmih bniah, ia kaba yn sa pynlong ka jingkhmih bniah ia baroh ki skhim kiba la pyntreikam ha ka ri baroh kawei bad kan dei tang hadien ba la dep ban khmih bniah ia ka jingpynlut pynsep ia baroh ki skhim bad ka tnad pla tyngka jong ka ri da kaba pynshong nongrim ia katei, kan sa pyllait ia ka pisa” la ong u Sangma.
U Sangma ula pynthikna ba katei ka jingbym pyllait pisa kam dei thik tang ia ka Meghalaya bad ka Sorkar Pdeng kan sa pyllait ia ka pisa shisien ba la pyndep ia ka jingkhmih bniah.
“Kumta, kam dei eh thik tang ia ka jylla Meghalaya marwei, kadei ha ka ri baroh kawei bad ngi khmih lynti ba yn sa pynbeit ryntih noh ia ki kam ki jam, ia ki rai lah dep ban shim, ka jingkylli kadei ba ka jingpyntreikam pura ka dang iaid shakhmat bad ka jingkhmih bniah ia ka jinglut jingsep kaba la bthah ban leh da ka kynhun myntri ka ri ia ki skhim kiba dang iaid shakhmat” ula bynrap.
 kadei halor ka rai ban pynsangeh shuwa ia ka jingpyllait pisa sha baroh ki jylla.){kind=link}