Shillong, Nohprah 9: Ka kynhun myntri ka sorkar Meghalaya kala mynjur ia ki artylli ki sienjam kiba iadei bad ka koit ka khiah – Meghalaya Pharmacists Service Rules bad ka Meghalaya Mental Health Care Rules da ka jingthmu ban pynkhlain ia ki lad ai jingsumar hapoh ka jylla.
“ia ki Rules la shna na ka bynta ka Meghalaya Pharmacists Service Rules (kaban khmih ia ka jingpynrungkam bad ia ka jinglong jingman jong ka jingshakri ki Pharmacist ha ka jylla). Ngim shim la don ia ki Service Rules na ka bynta ki Pharmacist ha Meghalaya kumta ia kitei ki Rules la mynjur da ka kynhun myntri,” ong u Myntri Rangbah ka jylla haba iakren bad ki nongthoh khubor hadien jong ka jingialang ka kynhun myntri kaba la long hynne ka sngi Baar.
Nalor kane ka kynhun myntri kala pdiang ruh ia ka Meghalaya Mental Health Care Rules, kaban pynwandur ia ka rukom treikam bad ia ka rukom khmih bad pyniaid ki jaka ai jingsumar ia kiba don jingpang ha ka bor pyrkhat hapoh ka jylla.
“Kitei (rules) ki long kiba kongsan bha, namar ba ngi don bun ki jaka ai jingsumar kiba khmih ia ka koit ka khiah, ki jaka sah bad kiwei kiwei ki jingdonkam na ka bynta ka koit ka khiah kiba don jingpang ha ka bor pyrkhat bad kum ka jylla, ngi ngim shim la don ia ki Rules ban pyntreikam ne synshar ne ka polisi. Kumta mynta ka sngi ngi lah mynjur ia kitei ki Rules,” la ong u Sangma.
“Ngi lah pynmih ia ki sienjam kiban ai bor bad ban pyrkhing ia ka jinglong jingman baroh jong ki jaka ai jingsumar kiba la don lypa bad kane kadei kata ka jingthmu” ula bynrap.
