Buh mawnongrim u CM ban kyntiew kyrdan ia ka Rymbai Govt HS school
Shillong Nohprah 08: U Myntri Rangbah ka Jylla u Meghalaya u Conrad K. Sangma hynne ka sngi Nyngkong, ula pynpaw ba kala don ka jingkylla kaba khraw ha ka jingkhmih lynti ki paidbah ha kylleng jong ka jylla, na ki jingdawa ia ki jing donkam kiba kongsan kum ki surok bad ka jingpynbiang ia ka umbam, sha ki jingangnud na ka bynta ki jingdonkam ha ki jingpule ha ki kyrdan kiba heh, ki jingtei kiba katkum kane ka juk kaba mynta bad ban kyntiew ia ka rukom im.
Haba kren ha ka jingialang jong ka jingbuh mawnongrim jongka Rymbai Government Higher Secondary School ha East Jaintia Hills, u Myntri Rangbah ka Jylla ula ong, ba kane ka jingkylla ha ka jingdawa ki shnong ki thaw kadei kaba pyni shai kdar ia ka jingkiew ha ka jinglong jingman bad ka jingiaid shakhmat jong ka jingkylla kaba dang iaid ha ka jylla Meghalaya.
“Haba lah pynbiang ia ki jingdonkam kiba kongsan, ki paitbah ki don shuh shuh ia ki jingangnud bad kadei thik kane kaba ngi lah sakhi ha kylleng ki bynta jong ka jylla” ula ong bad ka pynpaw ba ka sorkar ka iengskhem ha kaban jam shaphrang ban kyntiew ha ki liang ki bapher bapher.
U Myntri ka Pule Puthi u Bah Lahkmen Rymbui bad u MLA ka Khliehriat u Bah Kyrmen Shylla kila wan ban iashimbynta lang ha kane ka prokram.
Ula pynkynmaw ia ka por, ba ula leit ha ka sien kaba nyngkong eh ha Rymbai hadien ba ula shimti kum u Myntri Rangbah ha u snem 2020 bad ula pynpaw ia ka jingsniew jong ki surok, ka jingsahkut jong ki skhim sam umbam umdih bad ka jingbym don ia ki jingtei kiba biang. Ula pynpaw ia ka jingsngewhun ia ka jinglah ban iohi mynta ia ka jingbiang jong ki surok, ka jingioh ia ka umbam bad ka roi ka par jong ki skul.
“Watla ka lynti iaid nangne shakhmat ka long kaba jrong, hynrei ka jingkylla kala sdang. Ka Meghalaya kala iaid ha ka lynti kumba ngi lah angnud” ula bynrap bad ka kubur, ia ki jingtynjuh kiba la mad naduh u snem 2018, ka jingkyrduh pisa, ka jingbym bit bym biang ha ki tnad sorkar bad ka jingbym don ia ki jingtei kiba paka.
Ula iaroh ruh ia ka jingai ia ka jingrwai kyrpang da ki khynnah ka thain bad ula ong ba kadei ka khubor jongka jingsngewnguh bad jingsngewrit. Ula iaroh ia ka jingiatylli bad ia ka mynsiem jong ka jingiatreilang hapoh ka shnong Rymbai bad kane kadei ka dawbah jongka jingkiew shaphrang.
“Ka shnong Rymbai kadei beit kaba iatylli bad kaba pynleit jingmut ha ki kam kiba iadei bad ka roi ka par. Ki nongialam ha ka shnong, ki khlieh nongsynshar, ki nongialam niam bad ki kynhun ki samla ki dei hok ban ioh ia ka jingiaroh” ula ong.
Ka skul bad ka shnong kala aiti ia ka dorkhas ha kaba iadei bad ki jingtei kiba donkam, ban kyntiew ia ki Higher Secondary bad ban wanrah ia ki ‘Stream’ kiba thymmai ha ki jaka pule.
U Myntri Rangbah ula pynthikna ba ia baroh ki jingtyrwa yn sa khmih bniah bad ula pynthikna ba ka jingiakren ka lah dep sdang halor kaj ingdonkam shuh shuh ia ki kamra klas na ka bynta ka Higher Secondary School bad kubur ia ka jingdawa ban wanrah bad ban sdnag noh ia ka Science bad Commerce Stream.
Haba kren ia ki samla pule, u Myntri Rangbah ula kyntu ia ki, ba kidei ban pyndonkam hok ia ki lad kaba ki ioh, ban pule da kaba ryntih bad ban long kiba sngewrit. Ula pynkynmaw ba bun ki khynnah ha kiwei pat ki bynta jong ka jylla kim ioh ia kum kitei ki lad kiba biang.
Haba iengskhem halor ki jingkular jong ka sorkar, u Myntri Ragbah ula ong, ba ki kam ban wanrah ia ki jingkylla ha Rymbai bad ha kylleng ka Meghalaya kin iai bteng da ka jingpynleit jingmut kaba thymmai.
Kiwei pat kiba la iashimbynta ha ka jingialang ki kynthup ia ki heh ophisar sorkar kiba kynthup ia u Director of School Education & Literacy, u Deputy Commissioner, u SP bad ki nongmihkhmat na ki shnong bapher bapher.
