Cooch Behar Trophy | Kamai spah run u Narleng | Buh ka Meghalaya 312 run ia ka Nagaland

Shillong, Nohprah 08: U Gaurav Narleng u la lah ban kamai ia ka span ron kaba ar (second century) kaba pynlah ia ka kynhun ialehkai ka Meghalaya ba kan kamai haduh 312 ron ha ka jingiakhun pyrshah ia ka Nagaland, haka lympung ialehkai jong ka U-19 Men’s Cooch Behar Trophy 2025-26  plate group, ba sdang naduh mynta ka sngi ha madan ialehkai ka MCA, Polo.

Haduh ba kut jong ka sngi, ka Nagaland kaba la wan ba kan sdang ia ka pali tied ka jong ka, ka la lah ba kan 20 ron bad lap ba hap noh ar wiket bad ba dang shah tam da kumba 292 ron.

Ha kane ka jingiakhun, u Narleng u la lah ban kamai 127 ron kaba la wan tang na ki 129 tylli ki bol, kaba la wan hadien ba ka Nagaland hadien ba ka la jop ia ka jingkynting pisa (toss) ka la ailad shwa ia ka Meghalaya ba kan wan ba kan tied nyngkong, kaba shipor, kane ka rai I kumba ka la treikam ia ka Nagaland, hadien ba ka la lap ba pynhap syndet lai tylli ki wiket ka Meghalaya hadien ba ka la lah ba kan kamai 20 ron bad 73 ron naka bynta 4 wiket.

Hadien kane, u Narleng u la dei ka pali ka jong u ban wan shapdeng ka madan iakhun ryngkat bad u Angkit Tamang, ha kaba kine ki arngut ki la dem hi khui  bad tad haduh ba ka jingiakhun kan leit sha ka jingiabam ja sngi, ka Meghalaya ka la lah ba kan kamai 150 ron.

Hadien ba u Narleng u la out noh, u Angkit u iai bteng ban shim ia ka bynta kum u nongiada ia ka jong ka kynhun bad ban ai ia ka jingkyrshan ia u Rudra Singh Rathor uba la bteng ban kamai  haduh 58 ron, katba u Angkit u la lah ban kamai 52 ron ba la wan na ki 103 tylli ki bol.

Ha kane ka jingiakhun, ki rang ialehkai ka Nagaland, kin diaw bha ka mynsiem hadien ba ki la pynlehnoh ei ia ki kabu ksiar, hadien ba ki la pynhap sharud ia kiba bun tylli ki bol ba ki la dei ban kem suk ia ki bad kumjuh ka fielding ka jong ki hapdeng madan, kine kiei kiei baroh, ki la iarap pat ia ka Meghalaya ba kan lah ba kamai palat ia ka lai spah ron.

Wat la katta u Medempok Pongeng u long u bowler ba la paw ia ka Nagaland hadien ba u la ioh ban khur 3/46.

Ka Nagaland ka la ioh por kumba shi kynta tam ban sdang ia la ka pali wan tied ka jong ka, kaba  marsien ia sdang, ka la lap ba hap kynsan artylli ki wiket ki jong ba kynthup ia u Jesevilie Dzeyie uba la out ha u Narleng bad u Tachuye Trakha ha u Mewankitbok Kharpuri.

Kumta ka jingsdang kaba kum kane, ka long kaba ai mynsiem ia ki rang ialehkai ka Meghalaya  naka bynta ban phai pat sha ka sngi kaba ar jong kane ka jingiakhun, ha kaba ki nong kawang bol ki jong ka, kin hap ban kham trei shitom naka bynta ban lah ban pynhap kham kloi ia broh ki wiket ba sah jong ka Nagaland.