Shillong, Nohprah 08 : U Lamphang ka Iingdorbar Thaw Ain ka Jylla Thomas A Sangma ula pynbna ba ka jingtei ia ka Iingdorbar Thaw Ain ba thymmai ha Mawdiangdiang ha New Shillong Township, kan sa dep noh pura hapoh u Jylliew 2026.
U Thomas ula pyntip ia kane hadien ba lum ia ka jingialang bishar kam ha ka sngi Nyngkong, ban shim jingkhein ia ki jing iaid ki kam ba iadei bad ka jingtei ia ka Iingdorbar bad ban leh eiei halor ki jingeh kiba mih haba pyntrei ia ka project.
U Lamphang ula pynpaw ba ka jinglum ia ka jingialang bishar kam ba manla u bnai kala iarap bha ban pynjanai ia ka rukom peit pyrman ia ka kam bad ka jingnang iaid ki jingtrei.
“Nga sngewtynnad ban pyntip ba ka jingialang ka long kaba seisoh bha. Da kine ki jingialang bishar kam ba man ka por, ngi la lah ban peitngor bha ia ka jingiaid ki kam bad ban ithuh ia kiei kiba donkam ban leh katba ki jingpyntrei ki dang iaid shakhmat” ula ong.
U Lamphang ula pynskhem biang ba ka por ban pyndep ia ka Assembly Hall kan dang iai neh kumjuh, ha kaba la buh ia u bnai Jylliew 2026 kum ka thong.
Ula bynrap ba mar syn dep ka main hall, ka Dorbar jong ka Iingdorbar kan sa long noh ha kane ka complex.
U Thomas ula pyntip ruh ba un sa leit ban jurip biang ia kane ka project ha ka 11 tarik Nohprah ban peit dalade ia ka jing iaid ki kam bad ka rukom pyntrei ia ki kam.
Ha kane ka jingialang la wan ban iashimbynta da u Symbud Myntri Rangbah ba khmih ia ka Parliamentary Affairs Bah Prestone Tynsong, u Commissioner & Secretary ka Meghalaya Assembly Bah Andrew Simon bad ki Heh Ophisar ka Tnad Finance, PWD, NIC bad kiwei kiwei.
