Shillong, Nohprah 03 : U Myntri Rangbah ka Jylla Conrad K Sangma ha ka sngi Balang, ula pynbna ba ka Sorkar jong u, kala pyntreikam pura ia ka Rights of Persons with Disability Act bad ong ba ka jingthew ba shisha ia ka imlang sahlang kam dei sati aba kumno ngi niew ia kiba khlain hynrei kumno ngi iarap ban kyntiew ia kito kiba mad jingeh.
“Kat haduh mynta, ngi la pyntreikam pura ia ka Rights of Person with Disability Act, ka Meghalaya Rules bad ka State Policy for Empowerment” ong u Conrad haba ai jigkren ha ka jingialang ban rakhe ia ka International Day of Person with Disability ha U Soso Tham Auditorium. Kiba iadonlang ha kane ka sngi ki kynthup ia u Nongaibuit ka Tnad Social Welfare Bah Paul Lyngdoh.
U Conrad ula pyntip ba 41 tylli ki Ophis ka Sorkar lah shna ba kin long kiba lah ban poi mano mano ruh bad ki don ruh haduh 84 tylli ki website kiba lah ban pyndonkam.
“Mynta ka sngi, ngi rakhe ia ka jinglah kaba phylla; ka bor ban jop, ban thaw, bad ban ai mynsiem,” u la ong haba bynrap ba ki flagship programme ka Meghalaya ka la pynkylla ïa ki jingïathuhkhana na ka jingai jingïarap sha ka hok, na ka jingsngew synei sha ka burom bad kiwei kiwei.
U Conrad ula ong “Lyngba ka Meghalaya Grassroot Music Project, ngi la pynkha ia ka Eastern Brook Bank, ka kynhun ki nongput nongtem kiba don jingduna ha ki dkhot met, kiba mynta kila rah ia ka khana ka Jylla sha ka pyrthei”. U iathuh ba ka Sorkar kala ithuh ruh ia 30 ngut ki nongsengkam ba don jingduna dkhot met, ia kaba la bei tyngka mar T2.5 lak bad pynkha ruh ia ka Common Service Centre ba nyngkong eh kaba pyniaid da ki briew ha don jingduna dkhot met ha NE.
U Myntri Rangbah ula ong ruh ba ka Meghalaya Sign Bank App, 10,000 tylli ki sign bala ioh khusnam ha ka Ri, kala pynthikna ia ka jingiashimbynta lyngba ka kor digital da baroh ki nongshongshnong. “Ki jingai jingiarap ha Jylla kila poi sha baroh ki District bad ki 46 tylli ki Block ha kaba haduh 32,000 ngut ki PwD kila don ia ki Identity Card” ula ong haba bynrap ba 58 tylli ki scholarship la ai manla u snem sha kiba samla pule ba duna dkhot met bad haduh 370 ngut kila ioh jingmyntoi na kane.
U Myntri rangbah ula pynkup burom ruh ia ki PwD ba pawkhmat bad ai ia ka khusnam sha ki nongjop jong ka Inclusive Film Festival, EMPOWERFEST.
