Shillong, Naiwieng 28 : Ka Jaintia National Council (JNC) kala ujor pyrshah ia ka jingthmu jong ka Shree Cement Limited ban pyntrei ia ka project Integrated Cement Plant ha shnong Daitstong, East Jaintia Hills.
Ka JNC kala leit buh ia kane ka jingujor ha ka sngi Thohdieng, hakhmat u Deputy Commissioner ka East Jaintia Hills, Shivansh Awasthi, haba kdew ia ka jinglong beain ka rukom thied jaka da u Bharat Sharma na uwei u trai jaka ba kyrteng u Syrpailang Sukhlain.
“Kane ka jingiadie iathied jaka ka pynkhein ia ka Meghalaya Transfer of Land Regulation Act, 1971 bad ka Jaintia Hills Autonomous District Council (ADC) Rules” ong u President ka JNC Bah Sambormi Lyngdoh.
“Ka kaiphod EIA kam don satia ia ki kot ki sla ba kongsan, kynthup ka jingmynjur ka ADC, ki kot ki sla jong ka jingkylla dur, kaba pynlong ia ka jingiateh jaka ban long kaba khlem jingmyntoi naduh kaba sdang” ula ong.
Ka JNC kala dawa ban pynsangeh ia ka public hearing kaba la buh ban pynlong ha u Nohprah 2025, haba kdew ia ka jingpynkhein ia ka Meghalaya State Investment Promotion Facilitation Act (MIIPA) 2024 bad ka jingpynbna ka EIA ba pynmih ha u 2006.
“Ka MSPCB ka khlem leh hok iala ka kamram da kaba pyniaid shakhmat khlem da bishar ia ka jinglong trai jaka, kaba lah aibor pynban ia ki kompeni ban leh palat bad khlem burom shuh ia ka hok jong ki riewlum katkum ka Article 371B jong ka Riti Synshar” ong u Bah Sambormi.
Ka JNC kala maham ruh da ka jingiakhih lada ka projek ka iaid shakhmat khlem da pynbeit ia kine ki jingeh, da kaba buh ia ka sorkar ban bah iaka jingkitkhlieh na ka bynta kano kano ka jingkhihwin kaba mih na ka jingbym iahap ha ka rukom treikam.
Na ka liang jong u Deputy Commissioner ula pynthikna ba un sa shimkhia ia kane ka kam bad ban rah ktien sha ki bor ba halor, bad ban sa air uh ia ka kopi jong ka jubab jong u sha ka Seng hapoh khyndiat sngi.
“Ngi dawa ia ka jingtohkit ba mardor ia ka jinglong trai jaka, ka jingshisha jong ki kot ki sla, bad ki jingbthah sha ka MSPCB bad ka State Environment Impact Assessment Authority(SEIAA) ban pynsangeh noh mardor ia ka jingpynsngew paidbah (public hearing)” ula ong
Ka JNC kala pynpaw ruh ia ka jingbym lah ban shaniah ia ki jingkular aikam jong ka Shree Cement Limited da kaba kdew ia ka jingduna ha ka jingdon ki briew kiba tbit ban treikam bad ka jingbym don ki plan ai jinghikai.
 kala ujor pyrshah ia ka jingthmu jong ka Shree Cement Limited ban pyntrei ia ka project Integrated Cement Plant ha shnong Daitstong, East Jaintia Hills.){kind=link}