Imphal, Naiwieng 28: Kumba saw ngut ki shipai jong ka Assam Rifles kila mynsaw na ka encounter kala mih kynsan kynsan hapdeng ki lehnoh bad ki shipai pahara ha khappud Indo-Myanmar ha ka sngi Thohdieng.
Kane ka encounter ne ka jingia ther kuli kala jia ha ka por 4:30 mynstep.
Katkum ki reports, saw ngut ki shipai Assam Rifles kiba don ha khappud kila mynsaw hadien ba ki lehnoh kiba la pynkhreh bha bad ki tiar kila thombor da kaba ther da ki bom bom ha ryngkat ka siat kuli ha ka step phyrngap.Kane ka jingiather kuli kala neh kumba shiteng kynta hapdeng kine ki ar kynhun.
“Kynsan kynsan ki lehnoh kila thombor ia ka kynhun ki shipai Assam Rifles kiba don ha khappud ban pahara ha u pillar number 85 bad 86 kaba don hajan jong ka shnong Saibol Maringthel kaba hap hapoh ka Tengnoupal district,” la ong ki heh ophisar.
Kitei ki briew kiba don ryngkat bad ki tiar ki la ioh ban phet krad na katei ka jaka bad ki kam sha shilliang jong u pud ka Myanmar, hadien ba ki bor pahara ki dang wan shuh shuh sha katei ka jaka.
Ha kajuh ka por, ki bor pahara mynta kila nang pynkhlain shuh shuh ia ka jingpahara ha katei ka thain khappud hadien kane ka jingjia bad kila pynlong ruh ia ka joint security operations ha ka thain khappud.
