Shillong, Naiwieng 27: Ka Sorkar Jylla kala shim ia ka rai ban kyntiew ia ka jingtreikam kaba khuid ba suba bad kaba shai kdar halor ka jingthungkam kba la pynlong da ka District Selection Committee (DSC) ka East Jaintia Hills.
Ia kane ka rai la shim ha ka jingialang kaba la lum da ki bor pyniaid district ryngkat ka jingdonlang ki MLA ba kynthup ia u Bah Kyrmen Shylla na Khliehriat bad ka Kong Santa Mary Shylla na Sutnga-Saipung Constituency, kaba la long hynne ka sngi Palei.
Kiba la iadonlang ki kynthup ia ki dkhot jong ka DSC, ki Principal jong ki skul, ki nongmihkhmat na ka liang ka stad aiñ bad kiwei kiwei kiba donbynta lang ha ka kam.
La aiti ia ka shithi sha da u Bah R Siangshai bad u Nongiasaid Aiñ K Ksoo ha kaba kila pynpaw ia ki katto katne ki mat, kiba kynthup ba dei ban pyni ia ki Cut-Off Marks, ka Interview Ratio bad ka jingdonkam ban don ia ka jingkhuid jingsuba ha ka jingiadei bad ki kyrtong.
Ha katei ka jingiakren, ka committee kala shim ia ka rai ban kyntiew ia ka jingkhuid jingsuba bad ka jingshai kdar ha ka rukom thungkam da kaba pynmih ia ka jingpynbna ia kiba la shah jied ne ka Cut-Off Marks hadien ba la dep pynbna ia ka result. La pynskhem ba ka ratio ne ka jingdon ki kyrtong kiba la shah jied ha ka Personal Interview kadei beit ban neh ha ka ratio kaba 1:2.
Ban pynthikna ba ka jingpyntip kan long kaba biang bad kaba dei, ka DSC kadei ban pyntip beit mar mar ha ki kyrdan jong ka jingiaid jong ka jingthungkum lyngba ka Email bad SMS. Na ka bynta ban wanrah ia ka jingkhuid jingsuba bad ka jingtreikam kaba don ia ka jingshaniah dei ban pyllait ia ki Provisional Answer Keys bad ia ka Final Answer Keys ha ka website jong ka DSC hadien ba la dep pynlong ia ka eksamin.
Nalor kane la rai ruh, ba ka DSC kan wad ia ki lad ki lynti ba kan khang noh shwa shipor ia ka jingtreikam jong ki kor Internet ne ban buh da ki ‘Jammers’, CCTV ha ka por ba pynlong ia ki eksamin khnang ba kan ym don ka jingleh buittuh.
Hadien ba la dep ban thungkam dei ruh ban pynbna paidbah ia ka marks kaba la ioh da ki kyrtong ne ki samla kiba aplai kam bad dei ban pyllait ruh ia kane ha ka website jong ka district.
Ki bor pyniaid district kila iengskhem ha kaban pynthikna ba kan don ka jingkhuid ha ka rukom treikam treijam, ka jingkhuid jingsuba bad ka jingpaka ha ki kam baroh kiba iadei bad ka jingpynrungkam.
Kiba la wan iashimbhynta ha ka jingialang kila pynapw ia ka jingsngewhun ia ka jingmih na kane ka jingialang bad kila pynpaw ia ka jingsngewnguh ia u Chairman uba la lum ia kane ka jingialang.
Kila ai jingmut ruh ba ia kum kane ka jingialang dei ban lum man la ka por ban ailad ba don ka jingai ia ki jingmut bad ban kyntiew shuh shuh.
 ka East Jaintia Hills.){kind=link}