Nongpoh, Naiwieng 24 : Ki Pulit ka Ri-Bhoi District ha ka sngi Nyngkong, kila iamih biang ha Nongpoh ban ai jinghikai sha ki paid nongniah kali bad ki samla pule halor ki kyndon jong ka Motor Vehicle Act, ban wanrah ia ka jingshngain bad ka jingiada ia ki jingim briew na ka kam niah kali.
Shuwa ka jinghiar sha surok ban pynsngewthuh ia ki nongniah kali, ki Pulit ka Nongpoh Police Station bad Traffic Branch kila pynlong ia ka jingai jinghikai hapoh ka Conference Hall ka Nongpoh Police Station, kaba la wan iashimbynta da ki nongniah kali bad kumjuh ruh ki samla pule ka Mahatma Gandhi University (MGU), Byrnihat bad ki samla pule Law.
Ia kine ki nongiashimbynta la ialam ruh sha surok NH-6 ba kin sakhi ia ka rukom pyniaid kali khamtam ha ki surok ba bun ki paidbah ba leit ba wan.
Haba kren bad ki nongthoh khubor, ki samla pule ka MGU kila pynpaw ia ka jingkmen ba ki ioh iashimbynta ha kane ka prokram bad ban ioh jinghikai halor ki kyndon niah kali, kaba long kaba donkam eh ia ki ban tip haba ki niah ia ki kali.
Kila ai ka jingiaroh ia ki Pulit ka Ri-Bhoi hapoh ka jingialam u Senior Superintendent of Police Vivekananda Singh Rathore uba la shimkhia ban pynbeit ryntih ia ka rukom niah kali kat kum ki kyndon ka ain Motor Vehicle Act- kaba la wanrah ia ka jingkylla kaba khhraw ha ka rukom niah kali ki paidbah-kaba la pynduna ruh wat ia ki jingjia aksiden ha surok NH-6.
Kine ki samla kila pynpaw ia ka jingkloi ban iatreilang bad ki Pulit bad ban pynsaphriang ruh ia ki jinghikai ba kila ioh sha kiwei pat.
