Shillong, Naiwieng 22: Ka Department of Fisheries, ka Sorkar Jylla ha ka sngi Thohdieng kala rakhe ia ka World Fisheries Day ha kaba la pynlong ia ka prokram kaba banjur ia ka jingkongsan ban pynneh pynsah ia ki dohkha dohum, ban kyntiew ia ka jingkamai jakpoh bad ruh ban iada ia ka mei mariang bad ia ki jait jingim bapher.
Ha kane ka jingialang la wan ban iashimbynta da ki nongri dohkha, ki heh ophisar bad baroh kiba donbynta lang ha kane ka kam na kylleng ki bynta jong ka jylla Meghalaya.
U Myntri ka tnad Fisheries, u Timothy D. Shira, haba kren ha ka jingialang kum u Kongsan, ula banjur ba kala don ka jingkiew ha ka kam pynmih dohkha ha ka jylla bad ia ka jingkongsan ban iada ia ki dohkha bad ia ki sawdong sawkun jong ka mariang.
Nalor kane ula ai khublei ruh ia ka jingtrei shitrhem ki samla kiba la shimkhia ia ka kam ri dohkha kum ka lad kamai jakpoh bad ong, ba kane kadei ka jingleh kaba bha kaba iaid ryngkat bad ka jingiohi jngai jong ka jylla khamtam ha kaban kyntiew ia ka jingsengkam lajong ha ki thain nongkyndong.
U Myntri Sorkar ula banjur ia ka jingdonkam ban don ka roi ka par kaban iaid ryntihlang bad ka jingiada bad pynneh pynsah khamtam haba ka kam ri dohkha kadei kaba iadonbyntalang bad ka imlang sahlang bad ka ioh ka kot jong ki shnong ki thaw ha nongkyndong.
Ula pynpaw ruh ia ki sienjam kiba la shim da ka sorkar jylla lyngba ka tnad Fisheries kaba kynthup ia ka jingkyntiew ia ka jingri dohkha katkum ka juk stad saïan, ka jingbuh ia ki jaka pynkha ia ki symbai dohkha, ka jingai jinghikai pyntbit ia ki nongri dohkha bad ban pynkhlain ia ka imlang sahlang kiba pyniaid ia ki jaka ri dohkha.
Ula ong, ba ka sorkar jylla ka iengskhem halor ki jingkular hapoh jong ka Pradhan Mantri Matsya Sampada Yojana (PMMSY) ban kyntiew ia ka jingpynmih ia ki dohkha bad ban pynbha iaka kamai kajih jong ki nongri dohkha.
U Myntri ula kyntu ban don ia ka jingiatreilang hapdeng ki tnad sorkar, ki jaka pule kiba wad bniah bad ki shnong ki thaw ban pynthikna ba ka Meghalaya kan kylla long kum ka nuksa, ba ka jingri ia ki dohkha kan dei kaba iahap bad ka mariang ha ka thain.
Ha kane ka jingialang la pynkup burom ruh ia ki nongrep bad ki nongsengkam kiba la noh synniang bha ha kaba iadei bad ka kam ri dohkha ha kaba kila ioh pdiang ia ki khusnam bad ia ka song tyngka bad la ioh ruh ia ka jingkren na ki nongri dohkha kiba la iathuh ia ki khana jop ki jongki bad kala don ruh ka jingpyni ia ka jingri dohkha da kaba pyndonkam ia ki buit katkum ka jingstad saïan bad ka rukom pyniaid ia ki jaka ri dohkha da kaba don ia ka jingkitkhlieh.
