Shillong, Naiwieng 21: U Lat ka Jylla CH Vijayashankar ula ong ba ki shipai bala shongthait kiba don bynta ha ka jingiakhun thma, ki dei ki sakhi ba dang im ba pyni ia ka mynsiem ka jinglong shipai bad ka jingkhlain jong ka Ri.
U Lat ula kren ia kane ha ka jingialang pynkup burom ia ki shipai ba lah shongthait kiba la iadonbynta ha ki jingialeh thma, ki kurim jong ki shipai kiba la khlad ne ki Veer Naris, lem bad ki Ophisar ka Sainik Welfare Board, kaba la pynlong ha Raj Bhavan.
U Lat ka jylla u CH Vijayashankar ula plie ia kane ka jingialang kum u Kongsan ha kaba ula pynpaw ia ka jingsngewnguh bad burom ia ki shipai kiba shlur jong ka ri.
“Ka ri kala ioh ia ka shongsuk shongsain, kiew shaphrang bad ka iengskhem ha ki mawnongrim jong ka jinglen lade kaba la aiti da ki shipai ka ri. Ki shipai kiba la iakhun ia ka thma kidei ki sakhi kiba dang im ban pynshisha ia ka jingkhlain ka ri India ha ka jingdon ki shipai bad ka mynsiem ieid ri, kaba ka jingshakri ka jongki ka iai bteng ban ai mynsiem ia ka juk jong ki samla” la ong u Lat ka Jylla.
Ula iaroh ruh ia ka jingshlur bad ka jingiai neh jong ki Veer Naris ne ki kurim jong ki shipai kiba la khlad noh, da kaba ong “Ka jingkhlain ka jongki ka pyni ia ka jinglong jar jar hynrei kaba don pat ia ka mynsiem kaba shlur bha”.
U Lat ula iaroh ruh ia ka jingtrei shitom jong ki heh ophisar ka Sainik Welfare Board kiba la trei khlem shongthait.
“Kane ka jingtrei met bad mynsiem ka jongki, ka pynthikna ban pynbiang ia ka jingdonkam jong ki longiing longsem ki shipai bad la shimkhia ia ki da ka jingburom bad jingsngewlem, kaba pyni ia ka jingkular skhem jong ka jylla na ka bynta ka bha ka miat jong kito kiba la shakri ia ka ri”.
Ha kane ka jingialang, ki shipai kiba la iakhun thma kila iohlad ban iathuh ia ki khana ki jongki, la pynkup burom ia ki shipai kiba la shongthait bad ia ki Veer Naris da u Lat ka jylla bad kala don ruh ka jingiasyllok da ka jingthmu ban pynkhlain ia ka rukom ai jingshakri ia ki shipai kiba la shongthait bad ia ki bahaiing bahasem ki jongki.
Ki shipai kiba la iakhun teng ia ka thma bad ki Veer Naris kila pynpaw ia ka jingsngewnguh ia kane ka jingai jingithuh bad kila kubur ruh ia ka jingbat ia ka jingkular da ka jylla ha kaba iadei bad ka bha ka miat ka jongki.
