Shillong, Naiwieng 20: Ka Sorkar Jylla kala rai ban pynmih ia ka “Five Year Vision Plan’ ha kaba iadei bad ka thong ban sam ia ki marbam rashon ne ka Targeted Public Distribution System (TPDS) hapoh ka jylla.
Ia kane ka rai la shim ha ka State Level Workshop kaba la pynlong da ka Department of Food, Civil Supplies and Consumer Affairs (FCS&CA) ryngkat ka jingiatreilang bad ka United Nations World Food Programme (WFP).
Ka TPDS ka long ka bynta kaba kongsan bha halor ka jingpyrshang ka Meghalaya ban kynjoh ia ka Sustainable Development Goal (SDG) 2: Zero Hunger.
Kane ka Vision ka thmu ban pynkhlain ia ka jingshngain ka jylla halor ki marbam mardih, kaban ioh da palat 21 lak ngut ki briew, ia kaba la antad ba kan long kumba 80 percent na ka jingdon ki paid nongshong shnong.
Haba ialam ia kane ka jingialang, u Myntri Sorkar uba khmih ia ka Food Civil Supplies & Consumer Affairs u Bah Methodius Dkhar ula ong, “Ban pynthikna ia ka jingshngain bad jingpahuh ka bam na ka bynta baroh ki nongshong shnong ka Meghalaya, khamtam eh kito kiba don ha ki kyndon kynshrot bad kiba shah iehbein kadei kaba la buh hakhmat eh. Kane ka jingialang kadei ka sienjam jong ka jingiatreilang bad ki paralok kum ka WFP ban shim ia ki lad ki lynti nangne shakhmat bad ki buit treikam jong ka TPDS. Da kaba pdiang ruh ia ki jingkylla lyngba ki kor ki bor kiba mynta bad ki buit treikam, ngi iengskhem ban tei ia ka jingsam ia ki marbam mardih ha ka lynti kaba paka bad kaba khuid ba suba khnang ba yn um don mano mano ruh kiban shah iehnoh shadien”.
Ka nongmihkhmat bad Country Director jongka World Food Programme India ka Elisabeth Faure kala ong, “Ka Sorkar Meghalaya ka don ia ka jingiohi jngai ban sam ryntih ia ki marbam mardih kala long ka sienjam kaba kongsan ha ka thain. Ka WFP ka sngewsarong ban kyrshan ia kane ka lynti jong ka jingkylla. Lyngba ka jingiashimbynta lang ryngkat ka jingiaid da ka jingdon ia ki jingtip kiba biang, ngi kyrmen ban kyrshan ia ka Meghalaya ban pyni kumno ka jingshalan bad ki lad jingshngain ki lah ban treikam bha na ka bynta man la ki longiing, ban pynthikna ba kan don ka jingshngain ia ki marbam bad ia ka bam kaba tei ia baroh”.
Ka workshop kala pynmih ia ka jingiohi jngai, ki buit treikam kiba dei ban shimkhia mardor bad ki lynti ban wanrah ia ka jingkylla ha ka rukom pyniaid beit pyniaid ryntih ia ka TPDS, kaba iaid ryngkat bad ka thong jong ka ri bad ka SDG.
Kala pynjanai shuh shuh ia ka rukom treikam da kaba pyniasoh ia ka TPDS bad kiwei kiwei ki bynta kum ki jingbam kiba tei, ka rep ka riang, kamai kajih bad ka jingkyntiew ia ka roi ka par ha ki thain nongkyndong.
La pynwandur ia ka lynti iaid kaba bniah, kaba kdew ia ka jingdonkam ban pyndep ha ka por kaba la buh, ka kamram, ki bynta ban leh bad ki sienjam ban khmih bniah ban pynthikna ba kan treikam pura. Nalor kane, la ioh jingbatai ruh na ki riewshemphang ha kaba iadei bad kane ka bynta bad ia ki buit treikam ban kyntiew ryntih ia ka jingwanrah ia ka jingkylla.
 hapoh ka jylla.){kind=link}