Synniang ka IOCL ia ka Mobile Van bad Ultrasound sha ka RKM Dispensary

Shillong, Naiwieng 20: Ka Indian Oil Corporation Limited (IOCL) ka la synniang daka Mobile Medical Van bad ka Ultrasound machine sha ka Ramakrishna Mission Charitable Dispensary, Laitumkhrah, Shillong kum shi bynta ban pyntreikam iaka Corporate Social Responsibility (CSR).

Ia kine ki tiar la aiti da u IOAODSO exective jong ka jylla u R Nambiar, IOC senior manager Malati Malakar, secretary Ramakrishna Mission Swami Hitakamananda, assistant secretary Swami Divyalokananda bad ka nongioh khusnam Padma Shri ka Kong Silbi Passah.

Ha ka jingkren jong u Nambiar u la pynpaw ïa ki jingjop jong ka IOCL, kynthup ïa ka bynta ba kongsan jong ka ban pynthikna ïa ka jingsam ïa ki pyndonkam ban shet da kaba kdew ba ka jingtreikam kaba khlaiñ jong ka Corporation ka pynlah ïa ka ban kyrshan ïa ki jingthmu kiba wanrah ïa ki jingmyntoi ia ki paidbah.

U la bynrap ruh ba ka Mobile Medical Van bad ka Ultrasound kan pynkhlaiñ iaka thong ban ai jingsumar shaki jaka ba jngai bad ki jaka ba duna ka jingshakri paidbah bad kan pynbha ïaka jing wad bniah ïa ki jingpang ha ka dispensary.

U Malakar u la kren iaki kyntien “Ka Corporate Social Responsibility 2014 kadei ban shakri iaka imlang sahlang bad ia kine ki kyntien la kren ruh da u Swami Vivekananda”.

U la kdew ba ka Ramakrishna Mission, lyngba ki kam shakri bapher bapher jong ka, ka la ai jingmyntoi ïa ki hajar tylli ki jingim bad ka dang ïai bteng ïa ka mynsiem jong ka jingshakri paidbah.

Haba ai khublei, u Swami Hitakamananda u la ong, “Ki tiar ba ai thymmai ka IOCL kin pynlah ïa ka Mission ban shakri kham bun ki briew da ka jingtbit bad daka jingsngewrit.”